لکی مروت سے 10 مزدورں کو اغوا کر لیا گیا

لکی مروت (نمائندہ ڈیلی اردو) صوبہ خیبر پختونخوا کے ضلع لکی مروت کے سب ڈویژن بیٹنی سے 10 مزدورں کو اغوا کر لیا گیا ہے۔

پولیس کے مطابق مزدروں کو حسین خیل کے قریب نامعلوم افراد نے اغوا کیا ہے۔

پولیس کا کہنا ہے کہ مزدور تجوڑی سے شادی خیل سڑک پر تعمیراتی کام کے دوران اغوا کئے گئے ہیں۔

مزدوروں کا تعلق لکی مروت چارسدہ، بنوں، خیبر ایجنسی، کرک اور دیگر علاقوں سے ہے۔

اغوا ہونے والوں میں شاہ زیب، زاہد، سمران مروت، وقاص مندرہ خیل، علی حسین، سید غلام گنڈاپور، جنید، فرمان گنڈاپور، فرہاد اور زمان بھٹنی شامل ہیں۔

پولیس کا کہنا ہے کہ مغوی افراد کی بازیابی اور ملزمان کی گرفتاری کیلئے چھاپے مار رہے ہیں۔ پولیس نے اس سلسلے میں مقامی لوگوں سے بھی تعاون کی اپیل کی ہے۔

یاد رہے گزشتہ ہفتے شمالی وزیرستان میں 6 حجاموں کو بھی گولیاں مار کر ہلاک کیا گیا تھا۔

ہلاک کیے گئے افراد پیشے کے لحاظ سے حجام تھے اور مقتولین کی میر علی بازار میں ہیئر کٹنگ کی دکانیں تھیں۔ تمام مزدوروں کو نامعلوم افراد نے رات کی تاریکی میں فائرنگ کرکے ہلاک کیا گیا۔

اس سے قبل شمالی وزیرستان کے تحصیل سپین وام سے 8 غیر مقامی مزدوروں کو اغوا کیا گیا تھا۔ مقامی ذرائع کے مطابق ان مزدوروں کو گاؤں ششی سے اغوا کیا گیا۔

مغوی افراد سیکیورٹی چیک پوسٹوں کی تعمیر کا کام کررہے تھے۔ پولیس کے مطابق یہ مزدور ماڑی پٹرولیم کمپنی کے تھے۔ ان میں سے 5 کا تعلق ضلع لکی مروت سے ہے جبکہ 3 کا جنوبی وزیرستان سے ہے۔