لکی مروت میں سیکورٹی فورسز کی کارروائی میں ایک شدت پسند ہلاک

لکی مروت (نمائندہ ڈیلی اردو) صوبہ خیبر پختونخوا کے ضلع لکی مروت کے گاؤں بچکان عمر آباد میں سیکیورٹی فورسز کی فائرنگ سے ہلاک ہونے والے شدت پسند کی شناخت ہو گئی۔

ذرائع کے مطابق ہلاک شدت پسند کی شناخت عدنان عرف سعد کے نام سے ہوئی ہے، جو کالعدم تحریک طالبان پاکستان سے تعلق رکھتا تھا۔ کالعدم تنظیم نے اس ہلاکت کی تصدیق کرتے ہوئے دعویٰ کیا ہے کہ حملے میں کئی اہلکار ہلاک و زخمی ہوگئے ہیں۔

واضح رہے کہ گزشتہ روز ہلاک شدت پسند نے اپنے ساتھی کے ساتھ مل کر ایک سرکاری ملازم کو اغوا کرنے کی ناکام کوشش کی تھی۔ سیکیورٹی فورسز نے شدت پسندوں کو ہتھیار ڈالنے کا کہا، تاہم انہوں نے فائرنگ کر دی، جس پر جوابی کارروائی میں ایک شدت پسند ہلاک ہو گیا جبکہ دوسرا فرار ہو گیا۔

سیکیورٹی فورسز نے علاقے میں سرچ آپریشن شروع کر دیا ہے اور فرار ہونے والے شدت پسند کی تلاش جاری ہے۔