لکی مروت میں سی ٹی ڈی کی کارروائی، کالعدم تحریک طالبان پاکستان کے 2 دہشت گرد ہلاک

اسلام آباد (ش ح ط) صوبہ خیبر پختونخوا کے ضلع لکی مروت میں کاؤنٹر ٹیررزم ڈیپارٹمنٹ (سی ٹی ڈی) نے اہم کارروائی کرتے ہوئے کالعدم تنظیم تحریک طالبان پاکستان (ٹی ٹی پی) کے 2 دہشت گردوں کو ہلاک کردیا۔

https://twitter.com/ShabbirTuri/status/1479746455128604674?t=pEM09J_4UUBuU1e52MUJ_A&s=19

سی ٹی ڈی بنوں ریجن کی جانب سے رات تھانہ لکی مروت کے حدود وانڈہ امیر روڈ پر دہشت گردوں کیخلاف اہم کاروائی کی گئی ہے۔

سی ٹی ڈی کے مطابق دہشت گردوں کیخلاف انٹیلی جنس بیسڈ آپریشن کیا گیا ہے، آپریشن میں دہشت گردوں نے چھاپہ مار ٹیموں پر اچانک فائرنگ شروع کردی جس پر جوابی فائرنگ سے مبینہ طور پر 2 دہشت گرد ہلاک ہو گئے۔

ہلاک مبینہ دہشت گردوں کے قبضے سے دو عدد کلاشنکوف، چھ عدد میگزینز اور کارتوس برآمد کئے گئے ہیں جبکہ دہشت گردوں سے دو عدد بنڈر وئیر، بارودی مواد کی بوری، دیسی ساختہ آئی ای ڈی، شناختی کارڈ، نقد رقم، مختلف کارڈر اور دیگر سامان برآمد ہوئے ہیں۔

سی ٹی ڈی ذرائع کے مطابق دیگر دہشت گرد رات کے تاریکی کا فائدہ اٹھاتے ہوئے فرار ہوگئے، جن کی گرفتاری کیلئے سرچ آپریشن جاری ہے۔

ہلاک دہشت گرد لکی پولیس موبائل پر حملے میں ملوث تھے، جس میں 4 پولیس اہلکار ہلاک ہوئے تھے۔ ہلاک ہونے والے دہشت گرد آئی بی کے سب انسپکٹر خان بہادر کو ہلاک کرنے اور ٹارگٹ کلنگ، بھتہ خوری، بم دھماکوں اور پولیس موبائل پر حملے میں بھی سی ٹی ڈی بنوں کو مطلوب تھے۔

ہلاک دہشت گردوں کا تعلق کالعدم تنظیم TTP کمانڈر ہارون عرف ضرار گنڈاپور گروپ سے ہیں، ایک ہلاک دہشت گرد کی شناخت محمد نصیر عرف نصیر مولوی کے نام سے ہوئی ہے جبکہ دوسرے دہشت گرد کی شناخت آصف علی سکنہ لنڈیواہ کے نام ہوئی ہے۔

مبینہ دہشت گردوں کی لاشیں پوسٹ مارٹم کیلئے سٹی اسپتال منتقل کی گئی ہیں۔