ٹانک میں پولیس بکتر بند گاڑی پر دھماکا، ایس ایچ او سمیت 7 اہلکار ہلاک

پشاور (ڈیلی اردو) پاکستان کے شورش زدہ صوبے خیبر پختونخوا کے ضلع ٹانک میں تھانہ گومل کی حدود میں پولیس کی بکتر بند گاڑی پر آئی ای ڈی بم دھماکہ ہوا ہے جس کے نتیجے میں ایس ایچ او سمیت سات پولیس اہلکار ہلاک ہو گئے ہیں۔

پولیس کے مطابق دھماکہ اس وقت ہوا جب اے پی سی گاڑی تھانہ گومل سے ٹانک شہر کی طرف آ رہی تھی۔ دھماکے میں تھانہ گومل کے ایڈیشنل ایس ایچ او اسحاق خان ، ایس آئی شیر اسلم خان، ڈرائیور عبدالجمید، حضرت علی اور احسان اللہ جب کہ 2 ایف سی اہلکار ارشد علی اور اللہ خان بھی ہلاک گئے ہیں۔

پولیس حکام نے بتایا کہ دھماکے کے بعد ہلاک ہونے والے اہلکاروں کی میتوں کو ریسکیو 1122 کے ذریعے ڈسٹرکٹ ہیڈکوارٹر ہسپتال ٹانک منتقل کر دیا گیا ہے۔

ابتدائی اطلاعات کے مطابق دھماکہ خیز مواد سڑک کے کنارے نصب کیا گیا تھا۔ واقعے کے بعد علاقے کو گھیرے میں لے کر سرچ آپریشن شروع کر دیا گیا ہے۔

وزیراعظم شہباز شریف نے اس واقعے پر افسوس کا اظہار کرتے ہوئے کہا ہے کہ ’واقعہ کے ذمہ دار دہشت گردوں کو جلد از جلد ان کے منطقی انجام تک پہنچایا جائے گا۔‘

پیر کو وزیر اعظم آفس کے میڈیا ونگ کی طرف سے جاری بیان کے مطابق وزیراعظم نے ’واقعہ میں شہید ہونے والوں کے لیے مغفرت اور لواحقین کے لیے صبر و استقامت کی دعا کی۔‘

وزیراعظم نے واقعے کی فوری تحقیقات کی ہدایت کرتے ہوئے کہا کہ واقعے کے ذمہ دار دہشت گردوں کو جلد از جلد ان کے منطقی انجام تک پہنچایا جائے گا۔ انھوں نے کہا کہ حکومت پاکستان ملک سے دہشت گردی کے مکمل خاتمے کے لیے پر عزم ہے۔