پاکستانی فضائیہ نے مئی میں بھارت کے 6 جنگی طیارے مار گرائے، وزیر داخلہ محسن نقوی کا انکشاف

اسلام آباد (ڈیلی اردو) پاکستان کے وزیر داخلہ محسن نقوی نے دعویٰ کیا ہے کہ مئی میں بھارت کی جانب سے پاکستان کے فوجی اڈوں پر حملوں کے جواب میں پاک فضائیہ نے بھارت کے چھ جنگی طیارے مار گرائے جن کی ویڈیوز بھی موصول ہو چکی ہیں۔

محسن نقوی کے مطابق بھارتی حملوں میں ایک ایئر بیس کے سوا کوئی جانی یا مالی نقصان نہیں ہوا۔ انہوں نے کہا کہ پاکستان کی خفیہ ایجنسیوں نے بھارتی فیصلوں اور منصوبہ بندی کی بروقت اطلاعات فراہم کر کے دشمن کے عزائم ناکام بنائے۔

وزیر داخلہ نے کہا کہ فیلڈ مارشل عاصم منیر نے عالمی دباؤ کو نظر انداز کرتے ہوئے بھارت کو منھ توڑ جواب دیا اور بھارت میں آبادی کے قریب ایک فوجی تنصیب کو اس طرح نشانہ بنایا کہ ان کا بڑا تیل ڈپو تباہ ہو گیا، تاہم عام شہریوں کو نقصان نہیں پہنچا۔

ان کے مطابق بھارت چاہتا تھا کہ پاکستان کے کسی حملے میں عام شہری متاثر ہوں تاکہ اس کا فائدہ اٹھا سکے، مگر پاکستان نے احتیاط برتتے ہوئے صرف فوجی اہداف کو ہی نشانہ بنایا۔ وزیر داخلہ نے بتایا کہ پاکستان نے بھارت میں 26 سے 36 اہداف کامیابی سے نشانہ بنائے۔

محسن نقوی نے کہا کہ جب بھارت کے طیارے گرائے گئے تو فیصلہ کیا گیا کہ اس خبر کو شواہد آنے تک خفیہ رکھا جائے اور بعد ازاں تمام ویڈیوز موصول ہونے پر عوام کے سامنے لایا گیا۔ ان کے مطابق یہ سب ہماری خفیہ ایجنسیوں کی کامیابی تھی، اگرچہ ان کا ذکر زیادہ نہیں ہوتا۔

وزیر داخلہ نے مزید کہا کہ پاکستان کی مسلح افواج میں مکمل ہم آہنگی رہی، جبکہ بھارت کی افواج میں واضح تقسیم سامنے آئی جس کا انہیں خمیازہ بھگتنا پڑا۔