پاکستان: آزاد کشمیر سے بھارتی خفیہ ایجنسی ’را‘ کا ایجنٹ گرفتار

میرپور (ڈیلی اردو) پاکستان کے زیرِ انتظام کشمیر میں پولیس نے بھارتی خفیہ ایجنسی کے لیے کام کرنے والے مبینہ ایجنٹ کو گرفتار کر لیا ہے۔

آئی جی پولیس آزاد جموں و کشمیر لیاقت علی ملک نے نیوز کانفرنس میں بتایا کہ راولا کوٹ پولیس نے ایک شخص کو گرفتار کیا ہے جو مبینہ طور پر بھارتی خفیہ ایجنسی کے لیے کام کر رہا تھا۔

انہوں نے کہا کہ گرفتار ملزم عرفان حساس تنصیبات کی تصاویر اور ویڈیوز بنا کر غیر قانونی طور پر منتقل کر رہا تھا، جبکہ سوشل میڈیا کے ذریعے بھی معلومات اکٹھی اور شیئر کی جا رہی تھیں۔

آئی جی پولیس کے مطابق ملزم مختلف افراد کو ویڈیوز اور لوکیشنز کے حساب سے رقوم بھی فراہم کرتا تھا اور حساس مقامات کی معلومات دشمن عناصر تک پہنچانے میں ملوث تھا۔

انہوں نے مزید بتایا کہ سوشل میڈیا پر جعلی شناختوں کے ذریعے شہریوں کو ٹریپ کرنے کے واقعات بھی سامنے آ رہے ہیں، جن میں بعض افراد خود کو صحافی یا خاتون ظاہر کر کے لوگوں کو دھوکا دیتے ہیں۔

آئی جی پولیس نے عوام سے اپیل کی کہ وہ ایسے ہتھکنڈوں سے ہوشیار رہیں اور کسی بھی مشکوک سرگرمی کی فوری اطلاع متعلقہ اداروں کو دیں۔

یاد رہے کہ گزشتہ ہفتے پاکستان میں مختلف کارروائیوں کے دوران چار مبینہ بھارتی ایجنٹس کو گرفتار کیا گیا تھا۔