پاکستان میں دہشتگردی کیلئے افغان سرزمین کے استعمال کے شواہد سامنے آگئے

اسلام آباد (ڈیلی اردو)پاکستان کے شورش زدہ صوبے خیبر پختونخوا کے قبائلی ضلع باجوڑ میں 16 فروری کو ملنگی پوسٹ پر ہونے والے خودکش حملے کے بعد سکیورٹی ذرائع نے دعویٰ کیا ہے کہ پاکستان میں دہشتگردی کے تانے بانے سرحد پار افغانستان سے ملتے ہیں۔ ذرائع کے مطابق حملہ آور افغان شہری تھا جس کی شناخت احمد عرف قاری عبداللہ ابوذر کے نام سے ہوئی۔

سکیورٹی ذرائع کا کہنا ہے کہ حملہ آور افغانستان کے صوبہ بلخ کا رہائشی تھا اور طالبان کی اسپیشل فورسز کا حصہ بھی رہ چکا تھا۔ ذرائع کے مطابق 6 فروری کو اسلام آباد  میں ہونے والے خودکش حملے کے بمبار نے بھی افغانستان سے تربیت حاصل کی تھی۔

یاد رہے کہ 16 فروری 2026 کو ملنگی پوسٹ پر خودکش دھماکے میں دو بے گناہ شہریوں سمیت 11 سیکیورٹی اہلکار ہلاک ہوئے تھے۔

دوسری جانب خیبرپختونخوا حکومت نے واقعے میں ملوث سہولت کاروں اور معاونین کے خلاف بڑے ایکشن کا فیصلہ کیا ہے۔  سی ٹی ڈی ذرائع کے مطابق تین سہولت کاروں کے سروں کی قیمت پانچ کروڑ روپے مقرر کی گئی ہے اور ان کے خلاف سخت کارروائی کی جائے گی۔