پاکستان کا اقوام متحدہ کے ماہرین کے بیان پر سخت ردعمل، تبصرے کو یکطرفہ اور غیر متوازن قرار دے دیا

اسلام آباد (ڈیلی اردو) پاکستان کے دفتر خارجہ نے بلوچستان سے متعلق اقوام متحدہ کے بعض ماہرین کے بیان کو یکطرفہ، غیر متوازن اور غیر مصدقہ میڈیا رپورٹس پر مبنی قرار دیا ہے۔ ترجمان دفتر خارجہ شفقت علی خان نے ہفتہ وار پریس بریفنگ میں کہا کہ اقوام متحدہ کے ماہرین کے تبصرے معروضی حقائق اور مکمل سیاق و سباق سے عاری ہیں۔

ترجمان نے کہا کہ دہشت گرد حملوں میں شہری ہلاکتوں کو کم کر کے پیش کیا گیا ہے، جبکہ شرپسند عناصر کے جرائم اور انسانی حقوق کی خلاف ورزیاں نظر انداز نہیں کی جا سکتیں۔ ان کا کہنا تھا کہ بین الاقوامی قوانین کسی بھی فرد یا گروہ کو انسانی حقوق کو بطور ہتھیار استعمال کرنے کی اجازت نہیں دیتے، اور حکومت عوام کے جان و مال کے تحفظ کی اپنی ذمہ داری پوری کرے گی، خاص طور پر دہشت گردی سے متاثرہ علاقوں میں۔

بلوچستان کی صورتحال پر بات کرتے ہوئے انہوں نے کہا کہ شرپسند عناصر جان بوجھ کر عوامی خدمات میں رکاوٹیں ڈال رہے ہیں اور شہریوں کی آزادانہ نقل و حرکت متاثر کر رہے ہیں۔ ترجمان دفتر خارجہ کا کہنا تھا کہ احتجاج کی آڑ میں شدت پسندوں کے ساتھ ملی بھگت ثابت ہو چکی ہے، اور ریاستی اقدامات کو روکنے کے لیے منظم رکاوٹیں پیدا کی جا رہی ہیں۔

انہوں نے مزید کہا کہ جعفر ایکسپریس آپریشن میں مارے گئے پانچ شدت پسندوں کی لاشیں زبردستی قبضے میں لینا شرپسندوں اور شدت پسندوں کے گٹھ جوڑ کا واضح ثبوت ہے، تاہم پولیس نے ان میں سے تین لاشیں واپس حاصل کر لی ہیں۔

ترجمان دفتر خارجہ نے دوٹوک الفاظ میں کہا کہ شدت پسندوں اور ان کے سہولت کاروں کے لیے کسی قسم کی رعایت نہیں ہوگی، اور حکومت کے تمام اقدامات بین الاقوامی قوانین سے مکمل مطابقت رکھتے ہیں۔ انہوں نے یقین دہانی کرائی کہ ہر شہری کو آئینی حقوق کے تحت قانونی چارہ جوئی کا مکمل اختیار حاصل ہے۔