پشاور: خودکش حملہ آور کے گھر پر چھاپہ، 2 بھائی اور والدہ سمیت 4 گرفتار

پشاور (نمائندہ ڈیلی اردو) پاکستان کے شورش زدہ صوبے خیبر پختونخوا کے صوبائی دارالحکومت پشاور میں قانون نافذ کرنے والے اداروں نے اسلام آباد میں شیعہ جامع مسجد کے خودکش دھماکے کے سلسلے میں حملہ آور کے گھر پر چھاپہ مارا اور دو بھائیوں اور والدہ سمیت چار افراد کو حراست میں لے لیا۔ مبینہ حملہ آور کی شناخت یاسر کے نام سے ہوئی، اور اس کا قومی شناختی کارڈ دھماکے کی جگہ سے ملا تھا۔

تفتیش کے مطابق خودکش بمبار کئی ماہ افغانستان میں مقیم رہا۔ اسپیشل ٹیمیں، بشمول کاؤنٹر ٹیررزم کے افسران، سہولت کاروں اور معاونت فراہم کرنے والوں کے بارے میں تحقیقات کر رہی ہیں۔

واضح رہے کہ اسلام آباد کے علاقے ترلائی کلاں میں یہ خودکش دھماکہ ہوا تھا، جس میں 35 افراد ہلاک اور 169 زخمی ہوئے تھے، جبکہ 29 افراد کی حالت تشویشناک بتائی گئی۔ 

وفاقی دارالحکومت کے ہسپتالوں میں ایمرجنسی نافذ کر دی گئی تھی۔