پشاور میں پولیس موبائل پر حملہ، 3 افراد ہلاک، 2 ایس ایچ اوز زخمی

پشاور(ڈیلی اردو) خیبرپختونخواہ کے شورش زدہ دارلحکومت پشاور میں چارسدہ روڈ کے قریب نادرن بائی پاس پر پولیس پارٹی کو فائرنگ اور دستی بم حملے کا سامنا کرنا پڑا، جس کے نتیجے میں دو ایس ایچ اوز زخمی ہوگئے، جبکہ پولیس کی جوابی کارروائی میں دو حملہ آور اور ایک مطلوب اشتہاری مجرم ہلاک ہوگئے۔

کیپیٹل سٹی پولیس پشاور کے مطابق پولیس اہلکار تھانہ شاہ پور کی حدود میں نادرن بائی پاس سے گزر رہے تھے اور پولیس کو مطلوب اشتہاری مجرم ممتاز عرف ممتازے کو حراست میں لینے کے لیے جا رہے تھے کہ اچانک مسلح افراد نے پولیس موبائل پر حملہ کردیا۔

حملہ آوروں نے پولیس پارٹی پر فائرنگ کے ساتھ دستی بم بھی پھینکے، جس سے ایس ایچ او چمکنی اور ایس ایچ او پہاڑی پورہ زخمی ہوگئے۔

پولیس نے فوری جوابی کارروائی کرتے ہوئے حملہ کرنے والے دو افراد کو ہلاک کردیا، جبکہ کارروائی کے دوران پولیس کو مطلوب اشتہاری مجرم ممتاز عرف ممتازے بھی ہلاک ہوگیا۔

واقعے کے بعد پولیس کی مزید نفری موقع پر پہنچ گئی اور علاقے کو گھیرے میں لے کر سرچ آپریشن شروع کردیا گیا۔ پولیس کے مطابق ہلاک ہونے والے دونوں حملہ آوروں کی شناخت کا عمل جاری ہے۔

پولیس حکام کا کہنا ہے کہ ابتدائی طور پر واقعے کی ایک وجہ اشتہاری مجرم ممتاز کو نشانہ بنانے سے متعلق سامنے آ رہی ہے، تاہم حملے کے اصل محرکات اور دیگر پہلوؤں کا تعین تحقیقات مکمل ہونے کے بعد کیا جائے گا۔

علاقے میں سرچ آپریشن جاری ہے جبکہ پولیس کی جانب سے واقعے سے متعلق مزید تفصیلات تحقیقات اور کارروائی مکمل ہونے کے بعد سامنے لائے جانے کا امکان ہے۔