پلوامہ حملہ کیس: جیش محمد کے گرفتار دہشتگرد کی ضمانت عدالت نے مسترد کردی

جموں(ڈیلی اردو) پلوامہ حملے کی سازش کے مقدمے میں گرفتار جیشِ محمد کے مبینہ گراؤنڈ ورکر محمد اقبال راتھر کو بہن کی شادی میں شرکت کے لیے 10 روزہ عبوری ضمانت اور حراستی پیرول دینے کی درخواست عدالت نے مسترد کر دی۔

جموں کی خصوصی قومی تحقیقاتی ایجنسی (این آئی اے) عدالت نے درخواست پر فیصلہ سناتے ہوئے قرار دیا کہ ملزم کی ذاتی ضرورت کو قومی سلامتی، عوامی نظم و نسق اور شہریوں کے تحفظ سے متعلق وسیع تر مفادات پر فوقیت نہیں دی جا سکتی۔

محمد اقبال راتھر اس وقت آگرہ کی مرکزی جیل میں قید ہے۔ اس کی جانب سے مؤقف اختیار کیا گیا تھا کہ وہ اپنی سات بہنوں کا واحد بھائی ہے اور شادی کی مذہبی و خاندانی تقریبات میں اس کی موجودگی ضروری ہے۔ درخواست میں یہ بھی بتایا گیا کہ اس کے والد طویل عرصے سے علیل ہیں اور گھر میں شادی کی تیاریوں اور دیگر معاملات کے لیے کوئی دوسرا مرد رکن موجود نہیں۔

این آئی اے نے عبوری رہائی کی مخالفت کرتے ہوئے عدالت کو بتایا کہ راتھر دو دہشتگردی کے مقدمات کا سامنا کر رہا ہے۔ تحقیقاتی ادارے کے مطابق اسے عارضی طور پر رہا کرنے کی صورت میں ساتھیوں سے رابطے، گواہوں پر اثرانداز ہونے یا عدالتی کارروائی کو متاثر کرنے کا خدشہ موجود ہے۔

عدالت نے جسمانی طور پر شادی میں شرکت کی اجازت دینے سے انکار کیا، تاہم جیل انتظامیہ کو ہدایت کی کہ ملزم کو 5 اور 6 ستمبر کو صبح 11 بجے سے دوپہر ایک بجے تک ویڈیو کانفرنس کے ذریعے بہن کی شادی کی تقریب میں شریک ہونے کا موقع فراہم کیا جائے۔

واضح رہے کہ 14 فروری 2019 کو بھارت کے زیر انتظام کشمیر کے پلوامہ ضلع کے لیتھ پورہ علاقے میں سی آر پی ایف کے قافلے کو خودکش حملے کا نشانہ بنایا گیا تھا۔ حملے میں دھماکا خیز مواد سے بھری گاڑی قافلے سے ٹکرائی گئی، جس کے نتیجے میں 40 اہلکار ہلاک ہوئے تھے۔ واقعے کے وقت محمد اقبال راتھر جیل میں قید تھا، تاہم بعد ازاں اسے حملے کی مبینہ سازش سے متعلق مقدمے میں ملزم نامزد کیا گیا۔