سوڈانی فوج کا مبینہ خفیہ کیمیائی ہتھیاروں کا پروگرام بے نقاب، کلورین بموں کے استعمال کا انکشاف

خرطوم (ڈیلی اردو)سوڈان میں جاری جنگ کے دوران سوڈانی فوج پر کیمیائی ہتھیاروں کے مبینہ استعمال اور ایک خفیہ پروگرام چلانے کے سنگین الزامات سامنے آئے ہیں۔ واشنگٹن پوسٹ کی ایک رپورٹ میں دعویٰ کیا گیا ہے کہ فوج نے کلورین سے بھرے بم تیار کیے اور انہیں ریپڈ سپورٹ فورسز کے خلاف استعمال کیا۔

رپورٹ کے مطابق فوجی حکام نے مبینہ طور پر ان ہتھیاروں کے ذخیرے اور تیاری کے مقامات کو چھپانے کی کوشش کی۔ اخبار نے دستاویزات، ویڈیوز، پیغامات اور دیگر مواد کا جائزہ لینے کے بعد یہ رپورٹ شائع کی، جبکہ مشرق وسطیٰ کے سکیورٹی حکام نے یہ مواد سوڈان میں موجود ذرائع سے حاصل ہونے کا دعویٰ کیا ہے۔

رپورٹ میں بتایا گیا ہے کہ مبینہ پروگرام میں پانی صاف کرنے کے لیے استعمال ہونے والی کلورین کو ہتھیاروں میں استعمال کرنے، فوجی اڈوں پر وارہیڈز تیار کرنے اور دور دراز صحرائی علاقوں میں ان کی آزمائش جیسے اقدامات شامل تھے۔ بعض دستاویزات میں سینکڑوں کیمیائی گولہ بارود ذخیرہ کیے جانے کا بھی ذکر ہے۔

ماہرین اور مغربی انٹیلی جنس حکام سمیت 20 سے زائد افراد نے واشنگٹن پوسٹ کے ساتھ شیئر کیے گئے مواد کا جائزہ لیا۔ رپورٹ کے مطابق ان افراد نے دستاویزات کو کیمیائی ہتھیاروں کے پروگرام کے وجود کی قابلِ اعتبار علامات قرار دیا، تاہم بعض ماہرین نے واضح کیا کہ صرف دستیاب تصاویر اور ویڈیوز کی بنیاد پر حتمی تصدیق ممکن نہیں۔

دستاویزات میں ایسے پیغامات بھی شامل ہیں جن سے ظاہر ہوتا ہے کہ فوجی اہلکاروں نے کلورین گیس کو دفاعی ٹھکانوں میں موجود مخالف جنگجوؤں کو خوفزدہ کرنے اور انہیں پوزیشنیں چھوڑنے پر مجبور کرنے کے لیے استعمال کرنے پر غور کیا۔ ایک مبینہ پیغام میں پولیس کی ایک ایسی تنصیب کو نشانہ بنانے کی بات کی گئی جہاں ریپڈ سپورٹ فورسز کے جنگجو موجود تھے۔

رپورٹ میں مزید کہا گیا ہے کہ 2024 کے دوران مروی ایئر بیس پر کلورین بموں کی تیاری اور ذخیرہ کیے جانے سے متعلق پیغامات بھی سامنے آئے۔ ایک پیغام میں دعویٰ کیا گیا کہ سینکڑوں بم جمع کیے گئے تھے، جن میں سے 106 استعمال کیے جا چکے تھے۔

مبینہ پروگرام سے متعلق مواد میں طارق مدنی نامی ایک شخص کا بھی ذکر ہے، جسے مشرق وسطیٰ کے سکیورٹی حکام نے سوڈانی فوج کا افسر اور کیمیائی ہتھیاروں کے پروگرام کا اہم کردار قرار دیا۔ دستاویزات میں ان کے دیگر فوجی حکام، حتیٰ کہ عبدالفتاح البرہان سے رابطوں کا بھی ذکر کیا گیا ہے۔

رپورٹ کے مطابق مبینہ بم انتہائی سادہ طریقے سے تیار کیے گئے۔ تصاویر اور ویڈیوز میں گیس کے ذخیرہ کرنے والے سلنڈروں کو تبدیل کرکے ان پر دھاتی حصے اور پنکھ لگائے جانے کے مناظر دکھائے گئے ہیں، جبکہ ایک ویڈیو میں کلورین کو گولہ بارود میں منتقل کرنے کا مبینہ طریقہ بھی نظر آتا ہے۔

کلورین کے حصول سے متعلق مواد میں مختلف دعوے سامنے آئے ہیں۔ بعض دستاویزات میں بھارت سے پانی صاف کرنے کے لیے کلورین منگوائے جانے کا ذکر ہے، جبکہ دیگر پیغامات میں مصر کی سرحد کے راستے بڑی مقدار میں کلورین کے ٹینک پہنچنے کا دعویٰ کیا گیا ہے۔

دوسری جانب یونیسیف نے کہا ہے کہ اس نے 2023 سے 2025 کے دوران خرطوم کی ریاستی واٹر اتھارٹی کو پانی صاف کرنے کے لیے کلورین فراہم کی، تاہم ادارے کے پاس اپنی فراہم کردہ کلورین کے کسی غلط استعمال یا دوسری جگہ منتقل کیے جانے کا کوئی ریکارڈ موجود نہیں۔

امریکا پہلے ہی سوڈان پر مبینہ کیمیائی ہتھیاروں کے استعمال کے الزام میں پابندیاں عائد کرچکا ہے۔ امریکی محکمہ خارجہ نے گزشتہ سال کہا تھا کہ سوڈان نے بین الاقوامی قانون کی خلاف ورزی کرتے ہوئے کیمیائی ہتھیار استعمال کیے، تاہم اس وقت ان الزامات کی تفصیلی بنیاد عوام کے سامنے نہیں رکھی گئی تھی۔

سوڈانی حکومت نے ان الزامات کی تحقیقات کے لیے ایک کمیٹی بھی قائم کی تھی۔ بعد ازاں حکومت نے دعویٰ کیا کہ دستیاب شواہد اور فیلڈ میں کیے گئے جائزوں کی بنیاد پر کسی کیمیائی یا تابکار آلودگی کے شواہد نہیں ملے۔

رپورٹ کے مطابق ماہرین نے دستیاب مواد کو تشویشناک اور کیمیائی ہتھیاروں کے پروگرام کی جانب مضبوط اشارہ قرار دیا ہے، تاہم حتمی تصدیق کے لیے سوڈان میں متعلقہ مقامات تک رسائی اور مزید شواہد کی ضرورت ہے۔