بنوں میں سی ٹی ڈی اور پولیس کا آپریشن، 5 دہشتگرد ہلاک

بنوں(ڈیلی اردو) خیبرپختونخواہ کے شورش زدہ ضلع بنوں میں کاؤنٹر ٹیررازم ڈیپارٹمنٹ (سی ٹی ڈی) اور مقامی پولیس نے خفیہ اطلاع پر مشترکہ کارروائی کرتے ہوئے فائرنگ کے تبادلے میں 5 دہشتگردوں کو ہلاک کرنے کا دعویٰ کیا ہے۔

ذرائع کے مطابق بنوں کے علاقے میں دہشتگردوں کی موجودگی اور مشکوک نقل و حرکت کی اطلاع ملنے پر سی ٹی ڈی اور پولیس کی ٹیموں نے مبینہ ٹھکانے کو گھیرے میں لے کر کارروائی شروع کی۔ اس دوران سیکیورٹی اہلکاروں اور دہشتگردوں کے درمیان فائرنگ کا تبادلہ ہوا۔

ذرائع کا کہنا ہے کہ کارروائی کے دوران 5 دہشتگرد ہلاک ہوگئے، جبکہ متعدد دیگر دہشتگرد موقع سے فرار ہونے میں کامیاب ہوگئے۔ فرار ہونے والے عناصر کی تلاش اور علاقے میں موجود ممکنہ ساتھیوں کا سراغ لگانے کے لیے سرچ آپریشن جاری ہے۔

ذرائع کے مطابق ہلاک ہونے والے دہشتگرد بنوں اور گردونواح میں سرگرم ایک نیٹ ورک سے وابستہ تھے، تاہم ان کی شناخت اور دیگر تفصیلات فوری طور پر سامنے نہیں آسکیں۔

سی ٹی ڈی اور پولیس نے علاقے میں نگرانی مزید سخت کرتے ہوئے دہشتگردوں کے ممکنہ ٹھکانوں اور نقل و حرکت کے خلاف کارروائیاں جاری رکھنے کا عزم ظاہر کیا ہے۔