پنجاب: لاہور ہائی الرٹ! 3 خودکش بمبار شہر میں داخل

لاہور (نمائندہ ڈیلی اردو) محکمہ داخلہ پنجاب نے صوبائی دارالحکومت لاہور میں ممکنہ دہشت گردی کے خطرے کے پیش نظر تھریٹ الرٹ جاری کر دیا ہے۔ جاری کردہ الرٹ کے مطابق کالعدم تحریک طالبان پاکستان کا ایک کمانڈر تین خودکش حملہ آوروں سمیت شہر پہنچ چکا ہے۔

محکمہ داخلہ کے مطابق مصدقہ اطلاعات سے معلوم ہوا ہے کہ کالعدم تنظیم کا کمانڈر آصف عمر 25 فروری سے 3 مارچ 2026 کے دوران لاہور میں پولیس اور دیگر قانون نافذ کرنے والے اداروں کی تنصیبات کو نشانہ بنانے کی منصوبہ بندی کر چکا ہے۔

الرٹ میں بتایا گیا ہے کہ مذکورہ کمانڈر تین خودکش بمباروں کے ہمراہ وادی تیراہ کے راستے لاہور پہنچا، جنہیں افغانستان کے علاقے پکتیکا میں تربیت دی گئی۔ مزید کہا گیا ہے کہ لاہور سے تعلق رکھنے والے 3 سے 4 مقامی سہولت کار اس گروہ کی معاونت کر رہے ہیں۔

دستاویز کے مطابق مشتبہ عناصر اہداف کی ریکی مکمل کر چکے ہیں اور خودکش جیکٹس، اسلحہ، بارودی مواد اور ایک رکشہ بھی حاصل کر لیا گیا ہے، جبکہ بارود سے بھری گاڑی کو VBIED (وہیکل بورن امپرووائزڈ ایکسپلوسیو ڈیوائس) کے طور پر استعمال کیے جانے کا خدشہ ظاہر کیا گیا ہے۔

محکمہ داخلہ نے متعلقہ اداروں کو ہدایت جاری کی ہے کہ کسی بھی ناخوشگوار واقعے سے بچنے کے لیے فول پروف سیکیورٹی انتظامات، ناکہ بندی اور جامع چیکنگ کو یقینی بنایا جائے۔ شہر بھر میں حساس مقامات کی نگرانی بڑھانے اور مشتبہ افراد پر کڑی نظر رکھنے کی ہدایات بھی دی گئی ہیں۔

سیکیورٹی ذرائع کے مطابق قانون نافذ کرنے والے اداروں کو ہائی الرٹ کر دیا گیا ہے اور انٹیلی جنس بنیادوں پر کارروائیوں کا دائرہ کار وسیع کیا جا رہا ہے۔