پنجاب میں سکیورٹی ہائی الرٹ، کالعدم گروہوں نے پاکستان میں حملے بڑھانے کی دھمکی دی

واشنگٹن (ش ح ط) پاکستان میں کالعدم قرار دیے جانے والے شدت پسند گروہوں کی جانب سے لاہور میں مبینہ دہشتگردی کے منصوبے سے متعلق سکیورٹی تھریٹ اور پاکستان، افغانستان سرحدی کشیدگی کے بعد صوبائی دارالحکومت لاہور سمیت پنجاب بھر میں سکیورٹی ہائی الرٹ کر دی گئی ہے۔

اہم سرکاری عمارتوں، خصوصاً حساس اور قانون نافذ کرنے والے اداروں کی تنصیبات کی سکیورٹی سخت کر دی گئی ہے۔ 

لاہور سمیت صوبے بھر میں پولیس اور دیگر اداروں کی سکیورٹی میں غیر معمولی اضافہ کیا گیا ہے، جبکہ بعض اہم عمارتوں کے سامنے سے گزرنے والی شاہراہیں عام ٹریفک کے لیے بند کر دی گئی ہیں۔ عمارتوں میں داخل ہونے والوں کی جامع تلاشی اور مکمل ریکارڈ مرتب کیا جا رہا ہے۔

شہر کے داخلی و خارجی راستوں پر بھی نگرانی سخت کر دی گئی ہے اور مشکوک گاڑیوں کی تلاشی کے ساتھ ان کا ریکارڈ محفوظ کیا جا رہا ہے۔

دوسری جانب کالعدم تنظیم جماعت الاحرار نے اپنے پلیٹ فارمز پر ایک حکم نامہ جاری کیا ہے جس میں ملحقہ گروہوں کو پاکستان، خصوصاً سندھ اور پنجاب میں حملوں کی ہدایت کی گئی ہے۔

اسی طرح کالعدم تحریک طالبان پاکستان (ٹی ٹی پی) کے سربراہ نور ولی محسود اور جماعت الاحرار اور اتحاد المجاہدین کے کمانڈر حافظ گل بہادر کے تحریری بیانات کے بعد آڈیو پیغامات بھی سامنے آئے ہیں، جن میں امیروں، کمانڈروں اور جنگجوؤں کو افغان طالبان کی حمایت میں میدان میں آنے اور پاکستان میں بڑے حملے کرنے کی ہدایت کی گئی ہے۔

حکام کے مطابق کسی بھی ناخوشگوار واقعے سے نمٹنے کے لیے ہنگامی اقدامات مکمل رکھے گئے ہیں۔