پنجاب میں سی ٹی ڈی کے بڑے آپریشنز، 11 دہشت گرد گرفتار، خودکش بمبار کے اہم انکشافات

لاہور (نمائندہ ڈیلی اردو) پنجاب کے مختلف شہروں میں محکمہ انسداد دہشت گردی (سی ٹی ڈی) نے 166 انٹیلی جنس بیسڈ آپریشنز کرتے ہوئے 11 دہشت گردوں کو گرفتار کر لیا۔

ترجمان سی ٹی ڈی کے مطابق یہ کارروائیاں سرگودھا، راولپنڈی، پاکپتن، گجرات، چکوال، بہاولپور، بہاولنگر اور فیصل آباد میں کی گئیں۔

میانوالی میں کالعدم تحریک طالبان پاکستان (ٹی ٹی پی) کے ایک خطرناک دہشت گرد کو بارودی مواد سمیت گرفتار کیا گیا، جبکہ دیگر دہشت گردوں سے دھماکہ خیز مواد، ڈیٹونیٹرز، پمفلٹس اور نقدی بھی برآمد کی گئی۔

گرفتار ہونے والے دہشت گردوں میں حیدر سلطان، ولی رحمان، زبیر، امین، اکبر، مقصود خان، عمیر، ظفر اقبال، ابراہیم قاسمی، محب اللہ اور صدام حسین شامل ہیں۔

لاہور میں گرفتار خودکش بمبار کے سنسنی خیز انکشافات

لاہور کے علاقے برکی سے گرفتار ہونے والے خودکش بمبار شمس اللہ نے تفتیش کے دوران انکشاف کیا کہ اسے افغانستان میں تربیت دی گئی تھی۔ تربیت کے بعد اسے کالعدم جماعت الحرار کے کمانڈرز سلیمان اور قاسم خراسانی نے چمن کے راستے پاکستان بھیجا۔

ترجمان سی ٹی ڈی کے مطابق قاسم خراسانی پولیس لائنز پشاور اور لاہور میں پولیس افسران کی ٹارگٹ کلنگ کا ماسٹرمائنڈ ہے۔

گرفتار خودکش بمبار نے انکشاف کیا کہ تربیت کے دوران اسے نشہ آور اشیاء دی جاتی تھیں۔ سہولت کار علی نے اسے تین دن تک لاہور میں قیام کروایا اور خودکش جیکٹ فراہم کی۔

سی ٹی ڈی کے مطابق سہولت کار علی کی گرفتاری کے لیے انٹیلی جنس بیسڈ آپریشنز جاری ہیں۔

واضح رہے کہ چند روز قبل سی ٹی ڈی نے برکی کے علاقے سے شمس اللہ کو گرفتار کیا تھا۔

تونسہ میں پولیس چیک پوسٹ پر شدت پسندوں کا پانچواں حملہ

صوبہ پنجاب کے ضلع ڈیرہ غازی خان کے علاقے تونسہ میں پنجاب پولیس نے پولیس چیک پوسٹ پر شدت پسندوں کا پانچواں حملہ ناکام بنا دیا۔ 2 گھنٹے تک جاری رہنے والے مقابلے میں شدت پسندوں کو بھاری نقصان پہنچا اور وہ فرار ہونے میں کامیاب ہو گئے۔

تفصیلات کے مطابق، شدت پسندوں نے تھانہ وہوا کی لکھانی چیک پوسٹ پر حملہ کیا، جسے پنجاب پولیس نے بہادری سے ناکام بنا دیا۔ شدت پسندوں نے 10 سے 12 افراد کی تعداد میں حملہ کیا اور راکٹ لانچرز سمیت بھاری ہتھیاروں کا استعمال کیا۔ پولیس اہلکاروں کی الرٹ اور تھرمل امیج کیمروں کی مدد سے شدت پسندوں کی فوری نشاندہی کی گئی، اور پولیس کی جوابی کارروائی سے وہ چیک پوسٹ کے قریب پہنچنے میں ناکام رہے۔

آر پی او ڈیرہ غازی خان کیپٹن (ر) سجاد حسن خان نے آپریشن کی قیادت کی، اور پولیس کی کیو آر ایف ٹیمیں بروقت پہنچ کر شدت پسندوں کو پسپا کرنے میں کامیاب ہوئیں۔ آئی جی پنجاب ڈاکٹر عثمان انور نے پولیس اہلکاروں کی جرات کو سراہتے ہوئے کہا کہ شدت پسند بزدلانہ حملوں سے پنجاب پولیس کے عزم کو متزلزل نہیں کر سکتے۔