ڈیرہ اسماعیل خان سے خاتون خودکش حملہ آور گرفتار

ڈی آئی خان (نمائندہ ڈیلی اردو) پاکستان کے شورش زدہ صوبے خیبر پختونخوا میں کاؤنٹر ٹیررازم ڈیپارٹمنٹ (سی ٹی ڈی) نے ایک مبینہ خاتون خودکش حملہ آور کی گرفتاری کا دعویٰ کرتے ہوئے دہشتگردی کا بڑا منصوبہ ناکام بنانے کا اعلان کیا ہے۔

سی ٹی ڈی کے شعبہ تعلقات عامہ کے بیان کے مطابق ڈیرہ اسماعیل خان ریجن میں حساس ادارے کی مصدقہ اطلاع پر کارروائی کی گئی۔

اطلاع تھی کہ شیخ یوسف خیمہ بستی میں ایک جوان العمر خاتون خودکش حملے کی تیاری کر رہی ہیں۔ اس اطلاع پر سی ٹی ڈی کی اسپیشل ویپنز اینڈ ٹیکٹکس ٹیم (ایس ڈبلیو اے ٹی) نے چھاپہ مار کر مذکورہ خاتون کو گرفتار کر لیا۔

سی ٹی ڈی کے مطابق ابتدائی پوچھ گچھ میں خاتون نے انکشاف کیا کہ وہ عرصہ دراز سے کالعدم تنظیم کے کمانڈر شاہ ولی عرف طارق کوچی کی تربیت میں رہی ہیں، جو اب ہلاک ہو چکے ہیں۔ بیان میں کہا گیا ہے کہ خاتون نے حالیہ دنوں میں خودکش حملے کے لیے رضامندی ظاہر کی تھی اور اسے خودکش جیکٹ اور ہدف کمانڈر عاصم کی جانب سے فراہم کیا جانا تھا۔

حکام کے مطابق خاتون کے خیمے سے ایک کمانڈو بیگ برآمد ہوا جس میں پستول بمعہ کارتوس، پرفیوم (بارود کی بو چھپانے کے لیے)، دو موبائل فون، پاور بینک اور دیگر سامان شامل تھا۔ موبائل فونز سے مبینہ طور پر کالعدم تنظیم سے رابطوں کے شواہد بھی ملے ہیں۔

ذوالفقار حمید، انسپکٹر جنرل پولیس خیبر پختونخوا، نے سی ٹی ڈی ٹیم کی کارروائی کو سراہتے ہوئے اہلکاروں کے لیے نقد انعام کا اعلان کیا۔ سی ٹی ڈی حکام کا کہنا ہے کہ صوبے بھر میں دہشتگردوں کے مذموم مقاصد ناکام بنانے کے لیے بلا امتیاز کارروائیاں جاری رہیں گی اور ریاست مخالف عناصر کے خلاف زیرو ٹالرنس پالیسی پر سختی سے عمل کیا جائے گا۔