ڈیرہ اسماعیل خان میں سیکیورٹی فورسز کی کارروائی، ایک دہشت گرد ہلاک، تین گرفتار

ڈی آئی خان (نمائندہ ڈیلی اردو)پاکستان کے شورش زدہ صوبے خیبر پختونخوا کے ضلع ڈیرہ اسماعیل خان کی تحصیل کلاچی کے گاؤں لونی میں سیکیورٹی فورسز نے خفیہ اطلاع پر کارروائی کرتے ہوئے ایک دہشت گرد کو ہلاک کر دیا جبکہ تین دیگر کو گرفتار کر لیا۔

سیکیورٹی ذرائع کے مطابق کارروائی علی الصبح کی گئی، جس کے دوران مشتبہ مقام کا محاصرہ کیا گیا۔ 

ذرائع کا کہنا ہے کہ فورسز کو مطلوب افراد کی موجودگی کی اطلاع ملی تھی، جس پر ٹارگٹڈ آپریشن کیا گیا۔ کارروائی کے دوران فائرنگ کا تبادلہ بھی ہوا، جس میں ایک دہشت گرد موقع پر ہلاک ہوا۔

حکام کے مطابق گرفتار ہونے والے تین افراد میں سے ایک زخمی ہے، جسے طبی امداد کے لیے قریبی اسپتال منتقل کر دیا گیا ہے۔ دیگر دو افراد کو تفتیش کے لیے نامعلوم مقام پر منتقل کیا گیا ہے۔

سیکیورٹی ذرائع کا کہنا ہے کہ زیر حراست افراد سے اسلحہ اور دیگر سامان بھی برآمد کیا گیا ہے، تاہم سرکاری سطح پر برآمدگی کی تفصیلات جاری نہیں کی گئیں۔

آپریشن کے بعد علاقے میں سرچ اینڈ کلیئرنس آپریشن جاری رہا جبکہ سیکیورٹی مزید سخت کر دی گئی ہے۔