ڈیرہ غازیخان میں سی ٹی ڈی کی کارروائی، ٹی ٹی پی کے 4 دہشت گرد ہلاک

لاہور (نمائندہ ڈیلی اردو) پاکستان کے صوبہ پنجاب کے ضلع ڈیرہ غازی خان میں کاؤنٹر ٹیررازم ڈیپارٹمنٹ (سی ٹی ڈی) نے کارروائی کرتے ہوئے دہشت گردی کا منصوبہ ناکام بنا دیا۔ فائرنگ کے تبادلے میں کالعدم تحریک طالبان پاکستان کے 4 دہشت گرد ہلاک جبکہ 11 فرار ہوگئے۔

ترجمان سی ٹی ڈی کے مطابق سرحدی گاؤں جوتر کے قریب خفیہ اطلاع پر کارروائی کی گئی۔ اس دوران دہشت گردوں نے سی ٹی ڈی ٹیم پر فائرنگ کردی، جوابی کارروائی میں 4 دہشت گرد ہلاک ہوگئے جبکہ دیگر اندھیرے کا فائدہ اٹھاتے ہوئے فرار ہوگئے۔

سی ٹی ڈی کے مطابق دہشت گردوں سے رائفلیں، گولیاں اور بارودی مواد برآمد ہوا ہے۔ فرار دہشت گردوں کی گرفتاری کے لیے علاقے میں سرچ آپریشن اور ناکہ بندی جاری ہے جبکہ ہلاک دہشت گردوں کی شناخت کا عمل بھی جاری ہے۔

ترجمان کا کہنا ہے کہ دہشت گرد پولیس چوکیوں اور دیگر سرکاری تنصیبات پر حملوں کی منصوبہ بندی مکمل کرچکے تھے۔