کراچی: جماعت الدعوہ کے رکن کو 15 سال قید اور 10 لاکھ روپے جرمانہ کی سزا

کراچی (ڈیلی اردو) انسداد دہشتگردی کی خصوصی عدالت نے کالعدم تنظیم جماعت الدعوہ کے لیئے فنڈ اکٹھا کرنے کے مقدمے میں جرم ثابت ہونے پر مجرم کو مجموعی طور پر 15 سال 6 ماہ قید کی سزا سنادی۔

کراچی سینٹرل جیل میں انسداد دہشتگردی کمپلیکس میں خصوصی عدالت نمبر 12 نے کالعدم تنظیم جماعت الدعوہ کے لئے چندہ جمع کرنے کے مقدمے کا فیصلہ سنادیا۔ عدالت نے کالعدم جماعت کے رکن مجرم محمد عذیر کیخلاف جرم ثابت ہونے پر مجموعی طور پر 15 سال 6 ماہ قید کی سزا سنادی اور دس لاکھ 20 ہزار روپے جرمانہ بھی عائد کر دیا۔

عدالت نے فیصلے میں کہا کہ جرمانے کی عدم ادائیگی پر مزید 3 سال 2 ماہ قید کاٹنا ہوگی۔ پولیس کے مطابق مجرم ناظم آباد میں جماعت الدعوہ کے لیے چندہ اکھٹا کرتا تھا۔ اس کے قبضہ سے چندے کی رسیدیں برآمد ہوئیں۔ اسے 2020 کو شہریوں کی اطلاع پر مجرم کو گرفتار کیا گیا تھا۔