کراچی سے کالعدم ٹی ٹی پی کا انتہائی مطلوب دہشت گرد گرفتار

کراچی (نمائندہ ڈیلی اردو) صوبہ سندھ کے صوبائی دارالحکومت کراچی میں سی ٹی ڈی اور رینجرز نے مشترکہ طور پر کارروائی کرتے ہوئے پاکستانی طالبان کا انتہائی مطلوب دہشتگرد کو گرفتار کرلیا۔

ترجمان رینجرز کے مطابق رینجرز اور سی ٹی ڈی نے سائٹ ایریا میں کارروائی کر کے انتہائی مطلوب دہشتگرد کو گرفتار کیا۔ گرفتار دہشتگرد نور عالم عرف وفادار کا تعلق کالعدم تحریک طالبان پاکستان سے ہے جس کے قبضے سے اسلحہ اور بارودی مواد بھی برآمد کرلیا گیا ہے۔

گرفتار دہشتگرد 2014ء میں ٹی ٹی پی کے مفتی نور ولی کے گروہ میں شامل ہوا تھا۔

دہشتگرد جنوبی وزیرستان میں سیکیورٹی فورسز کی چیک پوسٹوں پر حملے میں بھی ملوث ہے۔

گرفتاری کے بعد ملزم نے اعتراف کیا ہے کہ اس نے 2021 میں ساتھیوں کے ہمراہ لیویز چیک پوسٹ پر حملہ کیا تھا، اس کارروائی میں لیویز کے 6 جوانوں کو اغوا کیا گیا تھا جبکہ جوابی کارروائی میں 2 ساتھی ہلاک ہوگئے تھے۔

دہشتگرد نے وزیرستان میں سیکیورٹی فورسز کے روٹ پر متعدد آئی ای ڈیز لگانے کا اعتراف بھی کیا ہے۔

ترجمان کے مطابق گرفتار دہشتگرد جنوبی وزیرستان کا رہائشی ہے اور کچھ عرصے سے کراچی میں روپوش تھا اور شہر میں دہشتگردی کی کارروائیوں کے لئے اپنا گروہ منظم کر رہا تھا۔