کراچی: قائداعظم ڈے پر دہشتگردی کا بڑا منصوبہ ناکام، ایس آر اے کے 2 دہشت گرد گرفتار

کراچی (ڈیلی اردو) صوبہ سندھ کے صوبائی دارالحکومت کراچی میں قائداعظم ڈے کے موقع پر دہشتگردی کا بڑا منصوبہ ناکام بنا دیا گیا ہے۔ بھارتی فنڈنگ سے چلنے والی تنظیم ایس آر اے کے 2 دہشت گردوں کو اتحاد ٹاؤن سے گرفتار کر لیا گیا۔

ایس ایس پی کیماڑی فدا حسین جانوری کے مطابق دہشتگردوں سے کلاشنکوف، 6 کلو بارودی مواد اور دستی بم برآمد ہوئے ہیں۔ دہشتگردوں کے نیٹ ورک کو بھارتی خفیہ ایجنسی ‘’را’’ چلا رہی ہے۔

کراچی پولیس افسر نے بتایا کہ ایک قوم پرست جماعت کی آڑ میں نیٹ ورک چلایا جا رہا ہے جس کا سرغنہ اصغر شاہ نامی دہشتگرد ہے۔ مطلوبہ دہشتگرد افغانستان میں روپوش اور ‘’را’’ سے رابطوں میں بھی ملوث ہے۔

ان کا کہنا تھا کہ گرفتار دہشتگرد محمد بچل نے 19 جون کو گھوٹکی میں قانون نافذ کرنے والوں پر دستی بم پھینکا۔ اس دستی بم حملے میں 2 سیکیورٹی فورسز کے اہلکار ہلاک ہوئے تھے۔ دوسرے دہشتگرد سہیل احمد نے 19 جون ہی کو لاڑکانہ میں سکول پر دستی بم حملہ کیا تھا۔