کراچی میں پولیس اور رینجرز کی مشترکہ کارروائی، ایران سے ہدایات لینے والے 2 بھتہ خور گرفتار

کراچی (ڈیلی اردو) صوبہ سندھ کے صوبائی دارالحکومت کراچی میں پولیس اور رینجرز نے ایران سے ہدایات لینے والے دو مشتبہ بھتہ خوروں کو گرفتار کر لیا۔

ترجمان کے مطابق پاکستان رینجرز اور پولیس نے مشترکہ طور پر گارڈن کے علاقے میں کارروائی کرتے ہوئے دو مشتبہ بھتہ خوروں کو گرفتار کر لیا۔

گرفتار ملزمان شہر میں بھتے سے متعلق سرگرمیوں کے لیے ایران میں مقیم اپنے ساتھیوں سے ہدایات لے رہے تھے۔

قانون نافذ کرنے والے اداروں نے گارڈن میں خفیہ اطلاع پر مشترکہ کارروائی کرتے ہوئے نور محمد اور عیسیٰ نامی دو ملزمان کو گرفتار کر لیا۔

گرفتار ملزمان نے لیاری کی ٹمبر مارکیٹ میں الفاروق آئرن اسٹور کے مالک کو واٹس ایپ کے ذریعے فون کیا اور خود کو وصی اللہ لاکھو کی سربراہی میں قائم گینگ کا رکن ظاہر کر کے 5 لاکھ روپے بھتہ طلب کیا۔

بعد میں ملزمان نے اپنی ڈیمانڈ 50 ہزار روپے تک کم کر دی اور تاجر سے کہا کہ وہ اپنے ملازم کے ذریعے گارڈن گیٹ پر نقدم رقم بھیجے، اطلاع ملنے پر پیرا ملٹری فورس نے ایک خصوصی ٹیم تشکیل دی جس نے جدید ٹیکنالوجی کا استعمال کرتے ہوئے دونوں مشتبہ افراد کو پکڑ لیا۔

تفتیش کے دوران گرفتار ملزمان نے انکشاف کیا کہ انہیں بھتہ خوری سے متعلق سرگرمیوں کے لیے ایران سے ہدایات مل رہی تھیں۔

ترجمان رینجرز کا کہنا تھا کہ گرفتار ملزم عیسیٰ کا پورا خاندان گزشتہ تین سال سے ایران کے شہر چابہار میں مقیم ہے اور ان کے ساتھیوں کی گرفتاری کے لیے کوششیں جاری تھیں۔