کراچی : رینجرز اور سی ٹی ڈی کی کارروائی، انتہائی مطلوب دہشتگرد ہلاک

کراچی(ڈیلی اردو) پاکستان رینجرز سندھ اور محکمہ انسداد دہشتگردی (سی ٹی ڈی) نے کراچی کے علاقے گلبائی، شیر شاہ میں مشترکہ کارروائی کے دوران فائرنگ کے تبادلے میں ایک انتہائی مطلوب دہشتگرد کو ہلاک کردیا۔

رینجرز کے ترجمان کے مطابق کارروائی کے دوران مشتبہ دہشتگرد نے اہلکاروں کو دیکھتے ہی فائرنگ شروع کردی، جس پر سیکیورٹی اداروں نے فوری طور پر اضافی نفری طلب کی اور علاقے کو گھیرے میں لے لیا۔ فائرنگ کے تبادلے میں مشتبہ دہشتگرد مارا گیا۔

ترجمان کے مطابق ہلاک دہشتگرد کا تعلق کالعدم دہشتگرد گروہ سے بتایا جاتا ہے جبکہ اس کی شناخت اور سابقہ سرگرمیوں سے متعلق معلومات جمع کی جارہی ہیں۔

ادھر کراچی کے جمالی پل کے قریب بھی سی ٹی ڈی کے ساتھ مبینہ مقابلے میں ایک دہشتگرد ہلاک ہونے کی اطلاع ہے۔ ریسکیو ذرائع کے مطابق ہلاک شخص کی شناخت 24 سالہ ساجد ولد نیاز ولی کے نام سے ہوئی ہے۔

دونوں واقعات کے حوالے سے قانون نافذ کرنے والے اداروں کی جانب سے مزید تحقیقات جاری ہیں، جبکہ ہلاک افراد کے ممکنہ ساتھیوں اور نیٹ ورک سے متعلق معلومات اکٹھی کی جارہی ہیں۔