کرم میں جھڑپیں: 4 دہشت گرد ہلاک، کئی پولیس اہلکار اغوا

واشنگٹن (ش ح ط) پاکستان کے شورش زدہ صوبے خیبر پختونخوا کے قبائلی ضلع کرم کے علاقے جابو میں زیرِ تعمیر پولیس اسٹیشن پر کالعدم تحریک طالبان پاکستان کے دہشتگردوں نے حملہ کیا، فائرنگ کے تبادلے میں دو دہشتگرد ہلاک ہو گئے۔

پولیس کے مطابق واقعہ اس وقت پیش آیا جب مزدور تعمیراتی کام میں مصروف تھے اور چند پولیس اہلکار سکیورٹی پر مامور تھے۔

دہشتگردوں نے تعمیراتی کام روکنے کا مطالبہ کیا، جس کے بعد پولیس اور دہشتگردوں کے درمیان جھڑپ ہوئی۔

اس دوران دہشتگرد چند مزدوروں اور پولیس اہلکاروں کو اغوا کر کے لے گئے، تاہم عمائدین اور پولیس کی ثالثی کے بعد مغویوں کو بازیاب کرا لیا گیا۔

دریں اثنا، سنٹرل کرم میں تھانہ مرغان کی پولیس چوکی پر بھی دہشتگردوں نے حملہ کیا، جہاں فائرنگ کے تبادلے میں دو دہشتگرد ہلاک ہو گئے جبکہ تین پولیس اہلکار زخمی ہونے کی اطلاعات ہیں۔

دونوں جانب سے بھاری ہتھیاروں کا استعمال کیا گیا، جبکہ پولیس اور سکیورٹی فورسز کی بھاری نفری طلب کر لی گئی ۔