کوئٹہ میں سی ٹی ڈی کی کارروائی، پولیس پر حملوں میں ملوث ٹی ٹی پی کا دہشت گرد گرفتار

کوئٹہ (ڈیلی اردو) صوبہ بلوچستان کے صوبائی دارالحکومت کوئٹہ میں کائونٹر ٹیررازم ڈپارٹمنٹ (سی ٹی ڈی) نے کارروائی کرتے ہوئے پولیس پر حملوں میں ملوث کالعدم تنظیم کے دہشت گرد کو گرفتار کرلیا۔

CTD BLN unearthed a TTP network in Qta being run from Afghanistan.

TTP terrorist Abdul Hadi @ Amrullah, afghan national, apprehended with HG & pistol, involved in attack on Police mobile in Qta on 26th December. Also divulged names of six associates, all Afghan nationals. pic.twitter.com/BY5fWTLLi2

— CTD Balochistan Police Official (@ctd_balochistan) January 25, 2024

ترجمان سی ٹی ڈی کے مطابق کالعدم تحریک طالبان پاکستان (ٹی ٹی پی) کا نیٹ ورک چلانے والا ملزم عبدالہادی عرف امرللہ افغان شہری اور افغانستان کے علاقے ذابل کا رہائشی ہے۔

ترجمان سی ٹی ڈی نے بتایا کہ ملزم اپنے 6 ساتھیوں کے ساتھ مل کر کوئٹہ میں نیٹ ورک چلاتا تھا، مزید کہا کہ ملزم گزشتہ ماہ ہونے والے پولیس وین پر حملے میں ملوث تھا۔

ترجمان کا کہنا تھا کہ ابتدائی تفتیش کے مطابق ملزم کے دیگر 6 ساتھیوں کا تعلق بھی افغانستان سے ہے۔

خیال رہے کہ 26 دسمبر 2023 کو کوئٹہ کے علاقے نواں کلاں میں گشت پر معمور پولیس موبائل پر دستی بم حملے کے نتیجے میں پولیس کے اسسٹنٹ سب انسپکٹر (اے ایس آئی) اور 3 راہگیر زخمی ہوگئے تھے۔

پولیس کے مطابق دستی بم حملہ نواں کلی کے علاقے پشتونستان چوک کے قریب ہوا تھا، جس میں پولیس کی موبائل کو نشانہ بنایا گیا۔

دھماکے سے موبائل میں موجود اے ایس آئی کے علاوہ قریب سے گزرنے والے تین راہگیر بھی زخمی ہوئے تھے۔