کویت نے حزب اللہ سے وابستہ دہشت گرد نیٹ ورک پکڑ لیا

کویٹ سٹی (ڈیلی اردو رپورٹ) کویت کی وزارت داخلہ نے اعلان کیا ہے کہ سیکورٹی ایجنسیز نے ایک دہشت گردانہ منصوبے کو ناکام بناتے ہوئے حزب اللہ سے وابستہ ایک نیٹ ورک کو گرفتار کر لیا ہے۔ 

پریس ریلیز ککے ممطابق کارروائی میں پانچ کویتی شہری اور ایک غیر کویتی شخص شامل ہیں، جن کی شہریت پہلے ہی معطل کی جا چکی تھی، جبکہ مزید 14 مطلوب افراد کی نشاندہی کی گئی ہے جو بیرون ملک فرار ہیں، جن میں پانچ کویتی، پانچ غیر کویتی، دو ایرانی اور دو لبنانی شہری شامل ہیں۔

وزارت داخلہ کے مطابق یہ نیٹ ورک ملک کے اہم رہنماوں اور ریاستی شخصیات کے قتل اور نقصان پہنچانے کے لیے سرگرم تھا، اور انہوں نے بیرون ملک تربیت حاصل کی تھی جس میں ہتھیار، دھماکہ خیز مواد، نگرانی کے طریقے اور قتل کی مہارتیں شامل تھیں۔

گرفتار افراد نے اپنی وابستگی اور دہشت گرد تنظیم کے ساتھ شمولیت کا اعتراف کیا ہے اور ان کے خلاف قانونی کارروائی کے لیے انہیں پبلک پراسیکیوٹر کے حوالے کر دیا گیا ہے۔ سیکورٹی ادارے مزید تحقیقات کر کے نیٹ ورک کے دیگر شامل افراد یا کسی بھی دہشت گرد تنظیم سے تعاون کرنے والوں کو پکڑنے کے لیے سرگرم ہیں۔

وزارت داخلہ نے زور دیا ہے کہ کویت کی قومی سلامتی، خودمختاری اور استحکام پر کسی قسم کا سمجھوتہ یا غفلت قابل قبول نہیں اور جو بھی دہشت گرد تنظیموں کے ساتھ تعاون کرے گا، اس کے خلاف سخت قانونی کارروائی کی جائے گی۔