یوکرین اور روس کے زمینی تبادلوں کا فیصلہ کییف کریگا، امریکی صدر ٹرمپ

واشنگٹن (نمائندہ ڈیلی اردو) امریکی صدر ڈونلڈ ٹرمپ نے کہا ہے کہ یوکرین اور روس کے درمیان ممکنہ زمینی تبادلوں کا فیصلہ مکمل طور پر کییف پر منحصر ہوگا۔ یہ بیان انہوں نے اپنے روسی ہم منصب ولادیمیر پوٹن سے ملاقات سے قبل ایئر فورس ون میں الاسکا روانگی کے دوران صحافیوں سے گفتگو میں دیا۔

ٹرمپ نے پوٹن کے ساتھ اپنے تعلقات کو سراہتے ہوئے کہا کہ ’’وہ ایک ذہین شخص ہیں، طویل عرصے سے یہ کام کر رہے ہیں اور میں بھی، ہم دونوں صدر ہیں، ہمارے درمیان اچھا تعلق اور باہمی احترام موجود ہے۔‘‘

امریکی صدر بعد ازاں الاسکا میں پوٹن سے ملاقات کریں گے۔ روانگی سے قبل انہوں نے اپنے سوشل میڈیا پلیٹ فارم ’ٹروتھ سوشل‘ پر لکھا: ’’بڑا امتحان!!!‘‘۔

ٹرمپ کے ہمراہ وزیر خارجہ مارکو روبیو، وزیر خزانہ اسکاٹ بیسنٹ، وزیر تجارت ہاورڈ لٹ نک اور خصوصی ایلچی اسٹیو وٹکوف بھی موجود ہیں۔