یوکرین میں سیز فائر نہ ہوا تو روس کیلئے نتائج تباہ کن ہونیگے، امریکی صدر ٹرمپ

واشنگٹن (نمائندہ ڈیلی اردو) امریکی صدر ڈونلڈ ٹرمپ نے خبردار کیا ہے کہ اگر روس یوکرین میں جنگ بندی پر آمادہ نہ ہوا تو اسے "انتہائی سنگین نتائج" بھگتنا ہوں گے۔

 کینیڈی سینٹر میں صحافیوں سے گفتگو میں ٹرمپ کا کہنا تھا کہ اگر جمعے کو روسی صدر ولادیمیر پوتن کے ساتھ ملاقات کے بعد بھی جنگ ختم نہ ہوئی تو یہ نتائج سامنے آئیں گے۔

صدر ٹرمپ نے بتایا کہ ان کی پوتن کے ساتھ "اچھی بات چیت" ہوئی، مگر یوکرین میں عام شہریوں پر راکٹ حملوں کی خبریں دیکھ کر صورتحال سنگین محسوس ہوتی ہے۔ انہوں نے یہ بھی کہا کہ ملاقات میں روسی سائبر حملوں کے الزامات پر پوتن سے سوال کریں گے۔

ٹرمپ نے امکان ظاہر کیا کہ ان کی موجودگی میں صدر پوتن اور یوکرینی صدر ولادیمیر زیلنسکی کی دوسری ملاقات بھی ہو سکتی ہے، جو جمعے کی ملاقات سے زیادہ مؤثر ہوگی۔ ان کا کہنا تھا کہ وہ ملاقات کے بعد زیلنسکی اور یورپی رہنماؤں سے براہِ راست رابطہ کریں گے۔

یوکرینی صدر زیلنسکی کے مطابق امریکی صدر نے یوکرین کی حمایت جاری رکھنے کی یقین دہانی کرائی ہے اور ملاقات کے بعد براہِ راست فون کال کرنے کا وعدہ کیا ہے۔

ادھر جرمن چانسلر فریڈرک مرز نے کہا ہے کہ الاسکا ملاقات میں یورپ اور یوکرین کے سکیورٹی مفادات کا تحفظ یقینی بنایا جائے، پہلے سیز فائر پر اتفاق ہو اور پھر پائیدار امن کا معاہدہ طے کیا جائے۔ 

انہوں نے واضح کیا کہ یوکرین پر روس کی ملکیت کو قانونی حیثیت دینا ممکن نہیں، اور اگر روس جنگ بندی پر راضی نہ ہوا تو یورپ و امریکہ مزید دباؤ ڈالیں گے۔