آپریشن عزم استحکام: دہشت گردوں کی جڑیں پنجاب میں ہے، میاں افتخار حسین

پشاور (ڈیلی اردو) عوامی نیشنل پارٹی نے بھی آپریشن عزم استحکام کی مخالفت کرتے ہوئے کہا ہے کہ دہشت گردوں کی جڑیں پنجاب میں ہیں۔

تفصیلات کے مطابق گورنر خیبر پختونخوا فیصل کریم کنڈی پشاور میں اے این پی کے باچا خان مرکز پہنچ گئے جہاں انہوں نے اے این پی کی اعلیٰ قیادت سے ملاقات کی اور سکیورٹی و سیاسی معاملات پر بات چیت کی گئی۔

ملاقات کے بعد میڈیا سے گفتگو کرتے ہوئے عوامی نیشنل پارٹی کے صوبائی صدر میاں افتخار حسین نے کہا کہ دہشت گردوں کی جڑیں پنجاب میں ہیں، آپریشن عزم استحکام کے فیصلے پر شدید تحفظات ہیں۔

انہوں نے کہا کہ اے این پی نے گورنر کو تحفظات کے حوالے سے آگاہ کردیا، آپریشن کسی صورت قابل قبول نہیں۔

میاں افتخار حسین نے فوجی آپریشن عزم استحکام کی مخالفت کرتے ہوئے کہا ہے کہ دہشت گردوں کی جڑیں پنجاب میں ہیں۔

انہوں نے کہا کہ 70 کالعدم تنظیمیں پنجاب میں موجود ہیں آج تک کس کالعدم تنظیم کیخلاف آپریشن ہوا؟ آغاز کرنا ہے تو ان سے کریں۔

میاں افتخار حسین کا کہنا تھا کہ جنرل فیض نے کس کے کہنے پر مذاکرات کئے؟ 40 ہزار دہشت گرد کیسے آئے؟ آپریشن کے حوالے سے قومی اور صوبائی اسمبلی کو اعتماد میں لیا جائے۔

انہوں نے کہا کہ دہشتگردی سے زیادہ منافع بخش کاروبار نہیں ہے۔ بین الاقوامی کھیل کھیلنے والوں کے سہولت کار یہ کاروبار ختم کرنا نہیں چاہتے۔