اسرائیل کا یمن پر جوابی حملہ، حدیدہ سمیت متعدد علاقوں پر شدید بمباری

صنعا + تل ابیب (ڈیلی اردو) مشرقِ وسطیٰ میں کشیدگی ایک نیا رخ اختیار کر گئی ہے۔ اسرائیلی فضائیہ نے یمن کے مختلف علاقوں، خصوصاً ساحلی شہر حدیدہ اور اس کے گرد و نواح میں شدید بمباری کی ہے۔ یہ کارروائی اس میزائل حملے کے ایک روز بعد کی گئی ہے جس میں یمن سے داغا گیا ایک میزائل اسرائیل کے بن گوریون ایئرپورٹ کے قریب آ گرا تھا۔

اتوار کو ہونے والے حملے میں اسرائیلی میڈیا کے مطابق آٹھ افراد زخمی ہوئے، جب کہ تل ابیب اور قریبی علاقوں میں کئی پروازوں کو عارضی طور پر موخر یا منسوخ کرنا پڑا۔

اسرائیلی حکومت نے واقعے کا فوری طور پر الزام حوثی باغیوں پر عائد کیا، جو ایران نواز سمجھے جاتے ہیں۔ اسرائیلی فوج (IDF) نے پیر کی صبح جوابی کارروائی کرتے ہوئے دعویٰ کیا کہ یمن میں حوثی ملیشیا کے فوجی انفراسٹرکچر، میزائل لانچر مراکز اور کمانڈ پوسٹوں کو نشانہ بنایا گیا ہے۔

یمنی میڈیا اور مقامی ذرائع کے مطابق، بمباری حدیدہ کی بندرگاہ اور اس کے اطراف کے علاقوں میں کی گئی جہاں کئی دھماکوں کی آوازیں سنی گئیں۔ شہری ہلاکتوں یا نقصانات سے متعلق مکمل تفصیلات ابھی سامنے نہیں آئیں، تاہم مقامی اسپتالوں میں ایمرجنسی نافذ کر دی گئی ہے۔

دوسری جانب، حوثی ملیشیا نے اپنے حالیہ بیان میں اس بات کی تصدیق کی ہے کہ ان کی میزائل فورس نے بن گوریون ایئرپورٹ پر حملہ کیا تھا، جسے وہ فلسطینی عوام کے ساتھ یکجہتی کا مظاہرہ قرار دیتے ہیں۔

مبصرین کے مطابق، اسرائیل اور یمن کے درمیان یہ نئی کشیدگی غزہ کی جنگ اور ایران-اسرائیل تنازع کا تسلسل ہے، اور خطے میں بڑے پیمانے پر جنگی محاذ کھلنے کا خدشہ پیدا ہو گیا ہے۔