اسرائیل کی لبنان میں حزب اللہ سے منسلک مالیاتی ادارے پر بمباری

بیروت (ڈیلی اردو) اسرائیل نہ صرف اپنے فضائی حملوں کی شدت بلکہ ان کے دائرہ کار کو بھی بڑھا رہا ہے۔ آج اس نے بیروت میں القرض الحسن مالیاتی ادارے کی کئی شاخوں کو نشانہ بنایا ہے۔

مقامی وقت کے مطابق دوپہر تک القرض الحسن کی تین شاخوں کو نشانہ بنایا جا چکا تھا۔ اس ادارے پر الزام ہے کہ یہ براہِ راست حزب اللہ کی عسکری سرگرمیوں کو مالی مدد فراہم کرتا ہے۔

حزب اللہ کا کہنا ہے کہ یہ بینک پورے لبنان میں مختلف کاروباروں اور نجی صارفین کو مالی خدمات فراہم کرتا ہے۔ اس ادارے کی شاخیں پورے شہر میں قائم ہیں۔

ہم جنوبی بیروت میں حزب اللہ کے زیرِ کنٹرول ضلع ضاحیہ سے گزر رہے تھے، جب ایک حملے میں ایک عمارت تباہ پو گئی۔ وہ اب بھی جل رہی تھی اور اس کے قریب واقع کئی عمارتوں کو بھی شدید نقصان پہنچا تھا۔

یہ شہر کا وہ حصہ ہے جسے اسرائیل نے فضائی حملوں میں بارہا نشانہ بنایا ہے، لیکن حالیہ دنوں میں شہر میں جن اہداف کو نشانہ بنایا جا رہا ہے ان میں سے کچھ ضاحیہ کی حدود سے باہر ہیں جہاں سے اسرائیل نے تمام شہریوں کو نکل جانے کا حکم دیا ہے۔

ان مقامات میں مالیاتی ادارے کی کچھ شاخیں اور ساحل پر واقع ایک ہوٹل بھی شامل ہے، جہاں اتوار کو ایران سے مبینہ تعلقات رکھنے والے چار افراد ایک ڈرون حملے میں مارے گئے تھے۔