اسرائیلی فضائیہ کے حوثی ٹھکانوں پر حملے، 10 ہلاک اور 35 زخمی

صنعاء (ڈیلی اردو/نیوز ایجنسیاں)  اسرائیل پر بیلسٹک میزائل حملے کے بعد اسرائیلی جنگی طیاروں نے یمن کے دارالحکومت صنعاء اور دیگر مقامات پر حوثی باغیوں کے ٹھکانوں کو نشانہ بنایا۔ حوثی حکام کے مطابق اتوار کو ہونے والے فضائی حملے میں 10 افراد ہلاک اور 35 زخمی ہوئے۔

حوثیوں کی وزارتِ صحت کا کہنا ہے کہ حملے کا نشانہ وسطی صنعاء میں ایک میونسپل عمارت، ایک تیل کمپنی کی تنصیب اور جنوبی صنعاء کا ایک بجلی گھر بنا۔ عینی شاہدین کے مطابق دھماکے کے بعد شہر میں آگ کے بڑے شعلے اور گھنا دھواں دیکھا گیا۔

اسرائیلی فوج کے بیان کے مطابق حملے حوثیوں کے فوجی مقامات، پاور پلانٹس، ایندھن ذخیرہ گاہ اور صدارتی محل کے قریب علاقوں پر کیے گئے۔ اسرائیل کا کہنا ہے کہ یہ کارروائی حالیہ میزائل حملے کے جواب میں کی گئی جس میں اسرائیلی فضائی دفاع نے میزائل کو راستے میں ہی تباہ کر دیا تھا۔

اکتوبر 2023 سے حوثی باغی اسرائیل پر میزائل اور ڈرون حملے کر رہے ہیں جن میں سے اکثر ناکام یا روک لیے گئے ہیں۔ اسرائیل ان حملوں کے جواب میں یمن میں حوثی تنصیبات پر بمباری تیز کر چکا ہے۔

حوثی گروپ کا دعویٰ ہے کہ ان کے حالیہ حملوں میں بین گوریون ایئرپورٹ کو نشانہ بنانے کی کوشش بھی شامل تھی۔ اسرائیلی وزیرِ دفاع اسرائیل کاتز نے خبردار کیا ہے کہ حوثی ’’ہر حملے کی کوشش کا سود سمیت خمیازہ بھگتیں گے‘‘۔