افریقی ملک کانگو میں جیل توڑنے کی کوشش، پولیس کی فائرنگ سے 129 قیدی ہلاک

کنشاسا (ڈیلی اردو )افریقی ملک کانگو میں جیل توڑنے کی کوشش کے دوران بھگدڑ مچنے اور پولیس اہلکاروں کی فائرنگ سے کم از کم 129 قیدی ہلاک ہوگئے۔

غیرملکی میڈیا کے مطابق، واقعہ دارالحکومت کنشاسا میں مرکزی مکالا جیل میں پیش آیا، جیل سے فرار ہونے کی کوشش کے دوران ہلاک ہونے والے 129 افراد میں سے زیادہ تر بھگدڑ مچنے سے ہلاک ہوئے۔

کونگو کے وزیر داخلہ نے ایک بیان میں کہا ہے کہ ابتدائی تحقیقات کے مطابق 24 قیدی جیل حکام کی انتباہی گولیوں سے بھی مارے گئے، جبکہ 59 قیدی زخمی ہیں جن کا علاج مقامی اسپتال میں ہورہا ہے۔
حکام نے بتایا کہ قیدیوں کے جیل سے فرار ہونے کی کوشش کے دوران خواتین کے ساتھ ریپ کے کچھ واقعات بھی رپورٹ ہوئے ہیں۔

ایمنسٹی انٹرنیشنل کی رپورٹ کے مطابق، کانگو کی مکالا جیل میں ڈیڑھ ہزار قیدیوں کی گنجائش ہے، لیکن جیل میں 12 ہزار سے زیادہ قیدیوں کو رکھا گیا ہے۔

مکالا جیل میں قیدیوں کے جیل توڑ کر فرار ہونے کے پہلے بھی کئی واقعات ہوچکے ہیں۔ 2017 میں ایک مذہبی تنظیم نے مکالا جیل پر حملہ کرکے درجنوں قیدیوں کو فرار کرا دیا تھا۔