افغان طالبان نے جنازے سے 45 افراد کو اغوا کرلیا

کابل (ڈیلی اردو) افغان طالبان نے سرکاری ملازم کے جنازے سے مرحوم کے 45 رشتہ داروں کو اغوا کرلیا۔

غیر ملکی خبر رساں ایجنسی ‘اے پی’ کے مطابق افغان وزارت داخلہ کے ترجمان نصرت رحیمی کے مطابق طالبان نے صوبہ جوزان میں مرحوم کی تدفین کے لیے جسد خاکی کو قبرستان لے جانے والے بزرگ افراد کو اغوا کیا، جبکہ جوانوں کو اغوا نہیں کیا گیا۔

Afghan officials say the Taliban abducted as many as 45 elderly family members of a government employee as they were attending his funeral. https://t.co/Np5JXdQJ5t

— The Associated Press (@AP) December 10, 2019

جوزان کے انٹیلی جنس سربراہ نے کہا کہ طالبان کابل حکومت کے ساتھ کام کرنے والے کسی بھی شخص کے جنازے میں شرکت نہ کرنے کی لوگوں کو دھمکی دیتے رہے ہیں تاہم انہوں نے اغوا کیے گئے افراد کی تعداد صرف 6 بتائی اور کہا کہ دیگر مقامی رہنما طالبان کے ساتھ ان کی رہائی کے لیے مذاکرات کر رہے ہیں۔

طالبان کی طرف سے فوری طور پر اغوا کے حوالے سے کوئی بیان سامنے نہیں آیا۔ واضح رہے کہ افغانستان کے تقریباً نصف علاقے طالبان کے کنٹرول میں ہیں جہاں تقریباً ہر روز حملے ہوتے ہیں جن میں افغان سیکیورٹی فورسز اور حکومتی عہدیداروں کو نشانہ بنایا جاتا ہے، تاہم ان حملوں میں متعدد عام شہری بھی ہلاک ہوتے ہیں۔

دوسری جانب افغانستان کے لیے امریکا کے نمائندہ خصوصی زلمے خلیل زاد نے ہفتے کے روز معطلی کے بعد افغان طالبان سے پہلے باضابطہ مذاکرات کیے تھے۔ امریکی صدر ڈونلڈ ٹرمپ نے ستمبر میں طالبان سے امن معاہدے کو مردہ قرار دیتے ہوئے مذاکرات معطل کر دیے تھے۔