افغانستان سے امریکی انخلا: ترکی کو ذمہ داریاں ملنے کا امکان

واشنگٹن (ڈیلی اردو) افغانستان سے امریکا اور نیٹو افواج کے انخلا کے بعد ترکی کو ذمہ داریاں ملنے کا امکان ہے۔

تفصیلات کے مطابق آزربائیجان سے واپسی پر میڈیا سے گفتگو میں ترک صدر رجب طیب اردگان کا کہنا تھا کہ امریکی صدر جوبائیڈن ملاقات میں واضح کردیا ہے کہ ترکی روسی ساختہ میزائل (S-400) کی خریداری کے معاملے پر اپنے موقف سے کسی صورت پیچھے نہیں ہٹے گا جب کہ رواں سال کے آخر میں افغانستان سے امریکا اور نیٹو افواج کے انخلا کے بعد ترکی کو ذمہ داریاں ملنے کا امکان ہے۔

واضح رہے کہ امریکا نے متعدد بار ترکی کو روسی ساختہ جدید ترین میزائل سسٹم ایس-400 خریدنے پر شدید تنقید کا نشانہ بنایا ہے اور پابندیاں بھی عائد کی ہیں تاہم ترکی نے اس معاملے پر دو ٹوک موقف اپناتے ہوئے امریکی دباؤ کو بالائے طاق رکھتے ہوئے جدید ترین میزائل سسٹم ایس-400 کا پہلا تجربہ بھی کیا ہے جو کامیاب رہا۔