افغانستان سے فائر مارٹر گولہ کرم میں گھر پر آ گرا، شہری ہلاک، 3 زخمی

کرم (نمائندہ ڈیلی اردو) پاکستان کے شورش زدہ صوبے خیبر پختونخوا کے قبائلی ضلع کرم کے وسطی علاقے میں مبینہ طور پر افغانستان کی جانب سے فائر کیا گیا مارٹر گولہ ایک رہائشی گھر پر آ گرا، جس کے نتیجے میں ایک شہری ہلاک جبکہ تین دیگر زخمی ہوگئے۔

پولیس کے مطابق واقعہ علاقے لوخے میں پیش آیا، جہاں مارٹر گولہ اچانک ایک مکان پر گرا اور زوردار دھماکے سے تباہی پھیل گئی۔

حکام کا کہنا ہے کہ زخمیوں کو فوری طور پر قریبی طبی مرکز منتقل کر دیا گیا ہے، جہاں انہیں طبی امداد فراہم کی جا رہی ہے۔

واقعے کے بعد علاقے میں خوف و ہراس پھیل گیا، جبکہ سیکیورٹی اداروں نے جائے وقوعہ پر پہنچ کر شواہد اکٹھے کرنا شروع کر دیے ہیں۔

پولیس کے مطابق واقعے کی نوعیت اور مارٹر گولہ فائر کیے جانے کے محرکات کا تعین کرنے کے لیے تحقیقات جاری ہیں۔