افغانستان کے پڑوسی افغان پناہ گزینوں کو ملک سے نہ نکالیں، این آر سی

واشنگٹن (ڈیلی اردو/وی او اے) انسانی ہمدردی کے ایک عالمی ادارے نے افغانستان کے پڑوسیوں پر زور دیا ہے کہ وہ آنے والے مہینوں میں لاکھوں افغان پناہ گزینوں کو اپنے ملک سے واپس نہ بھیجیں کیونکہ وہ ملک عشروں کے تنازعے، اقتصادی بدحالی اور آب وہوا سے منسلک چیلنجوں کی وجہ سے انہیں واپس لینے کے لیے تیار نہیں ہوسکا ہے۔

ناروے کی ریفیوجی کونسل، یا این آر سی نے رپورٹ دی کہ ایران مارچ تک تقریباً بیس لاکھ افغان پناہ گزینوں کو ملک سے نکالنے کا ارادہ رکھتا ہے ،جب کہ پاکستان سے کم از کم آٹھ لاکھ کو پہلے ہی اکتوبر 2023 میں افغانستان واپس بھیج دیا گیا تھا۔۔

این آر سی کے سیکرٹری جنرل، Jan Egeland نے کہا ہے کہ، ایران سے ملک بدری کے خطرے سے دوچار واپس جانے والے بہت سے افغان شہری، جن سے میں اس ہفتے سرحد پر ملا تھا، محسوس کرتے ہیں کہ وہ ایک غیر یقینی صورتحال میں رہ رہے ہیں۔‘‘

انہوں نے مزید کہا،’ افغان شہریوں نے بہتر اور محفوظ زندگی کی تلاش میں افغانستان چھوڑا تھا اور اب وہ ایک غیر یقینی مستقبل کے ساتھ افغانستان لوٹ رہے ہیں، جہاں انہیں ویسی ہی بے روزگاری، بھوک اور انسانی حقوق کی خلاف ورزیوں کا سامنا ہوگا جن کی وجہ سے ہی وہ اپنا وطن چھوڑنے پر مجبور ہوئے تھے۔

این آر سی نے نشاندہی کی ہے کہ واپس آنے والے بیشتر افغان شہری جنہیں ملک کے شہری علاقوں میں رہنے پر مجبور کیا جارہا ہے، روزگار اور رہائش کی تلاش کے لیے جدو جہد کر رہے ہیں۔

اگرچہ ان میں سے کچھ کے خاندانی روابط ہیں، تاہم بہت سو ں کے پاس برسوں ملک سے باہر رہنے کی وجہ سے روابط کی کمی ہے اور ان کےپاس کوئی جائے پناہ نہیں ہے۔

ایگیلینڈ نے افسوس کا اظہار کرتے ہوئے کہا کہ افغانستان میں بے پناہ انسانی ضروریات کو پورا کرنے کے لیے بین الاقوامی امداد ضروری ہے، لیکن اب یہ کم ہوتی جا رہی ہے۔ انہوں نے مزید کہا کہ افغانستان کے لئے غیر سرکاری گروپوں کی مالی مدد اور انسانی ہمدردی پر مبنی مالی معاونت میں کمی کا خمیازہ لڑکیوں اور خواتین کو بھگتنا پڑ رہا ہے۔

این آر سی کے سربراہ نے کہا کہ اگست 2021 میں جب سے طالبان نے ملک پر دوبارہ کنٹرول حاصل کیا ہے، دنیا نے انسانی ہمدردی کے بدترین بحران میں پھنسے افغان شہریوں کی ضروریات کی طرف سے اپنا منہ موڑ لیا ہے۔

ایگیلینڈ نے کہا، ’’غریب اور بے گھر افغان، دربدر ہوجانے والے خاندانوں اور پناہ گزینوں کی معاونت کے کسی حقیقی اور پائیدار حل کے فقدان کی بھاری قیمت ادا کر رہے ہیں۔‘‘