“امریکہ انڈیا کے ساتھ کھڑا ہے، حقِ دفاع کی حمایت کرتا ہے”، بھارتی وزیر دفاع کا دعویٰ

نئی دہلی (ڈیلی اردو) بھارت کے وزیر دفاع راج ناتھ سنگھ نے دعویٰ کیا ہے کہ امریکی وزیر دفاع پیٹ ہیگسیٹھ نے جمعرات کے روز ان کے ساتھ ہونے والی ٹیلیفونک گفتگو میں کہا ہے کہ “امریکہ انڈیا کے ساتھ کھڑا ہے اور اس کے حقِ دفاع کی حمایت کرتا ہے۔”

راج ناتھ سنگھ نے اس گفتگو کی تفصیلات سماجی رابطوں کی ویب سائٹ ‘ایکس’ پر جاری کی ہیں، تاہم فی الحال امریکی وزیر دفاع کے دفتر کی جانب سے اس بارے میں کوئی باضابطہ بیان جاری نہیں کیا گیا۔

انڈین وزیر دفاع کے مطابق، امریکی ہم منصب نے پہلگام حملے میں ہونے والی ہلاکتوں پر افسوس کا اظہار کیا اور دہشت گردی کے خلاف انڈیا کی کوششوں کی حمایت کا اعادہ کیا۔ راج ناتھ سنگھ نے دعویٰ کیا کہ انھوں نے امریکی وزیر دفاع کو پاکستان کی مبینہ دہشت گردی سے متعلق پالیسیوں سے آگاہ کیا، جن میں دہشت گرد تنظیموں کی مبینہ حمایت، تربیت اور مالی معاونت شامل ہے۔

انہوں نے اس بات پر بھی زور دیا کہ عالمی برادری کو دہشت گردی کی کارروائیوں کے خلاف دوٹوک اور واضح موقف اپنانا چاہیے۔

یہ بیان ایک ایسے وقت میں سامنے آیا ہے جب حالیہ دنوں میں کشمیر کے علاقے پہلگام میں ایک مہلک حملے میں سیکیورٹی اہلکار ہلاک ہوئے تھے، جس کے بعد انڈیا میں پاکستان مخالف بیانات میں اضافہ دیکھا گیا ہے۔