امریکہ اور اسرائیل نے ایران کی فوجی صلاحیتیں تباہ کر دیں

واشنگٹن (ڈیلی اردو) اسرائیل اور امریکہ کے حملے کے بعد ایران کے جانب سے شدید ابتدائی ردعمل نے بہت سے سوالات کھڑے کر دیے تھے۔

کیا امریکہ کے اتحادی اپنا دفاع جاری رکھ سکیں گے؟ کیا ان کے مہنگے فضائی دفاع نظام سستے ڈرونز کے پے در پے حملوں کا مقابلہ کرنے کی صلاحیت رکھتے ہیں؟

تاہم اب بظاہر ایسا لگتا ہے کہ یہ خدشات کم ہو گئے ہیں۔

امریکیوں کا کہنا ہے کہ سنیچر کے روز کے مقابلے میں ایران کی جانب سے داغے جانے والے بیلسٹک میزائلوں کی تعداد میں 86 فیصد کمی آئی ہے جبکہ ڈرون حملوں کی تعداد میں 73 فیصد کمی واقع ہوئی ہے۔

امریکہ اور اسرائیل نے ایران کی بہت سی صلاحیتوں کو تباہ کر دیا ہے، حالانکہ مغربی حکام تسلیم کرتے ہیں کہ یہ عین ممکن ہے کہ پاسدارانِ انقلاب نے طویل عرصے تک لڑائی جاری رکھنے کے لیے کچھ ہتھیار سنبھال کر رکھے ہوں۔

فضا میں بالادستی حاصل کرنے کے بعد، اسرائیلی اور امریکی جیٹ طیارے اب ایرانی حدود میں بلا کسی روک ٹوک کے پرواز کرنے کے لیے آزاد ہیں۔

اس کا مطلب ہے کہ اب انھیں محفوظ فاصلے سے فائر کیے گئے انتہائی مہنگے میزائل کی ضرورت نہیں رہی اور وہ اب سستے جی پی ایس گائیڈڈ بموں کے اپنے وسیع ذخیرے کو استعمال کر سکتے ہیں۔