امریکی شہریوں کیلئے پاکستان میں ہنگامی حفاظتی ہدایات جاری

واشنگٹن (ڈیلی اردو) امریکی حکومت نے خبردار کیا ہے کہ افغانستان اور پاکستان کے درمیان بڑھتی ہوئی سرحدی کشیدگی کے باعث پاکستانی سکیورٹی فورسز نے بڑے شہروں میں اپنی موجودگی بڑھا دی ہے۔ 

امریکی بیان کے مطابق قانون نافذ کرنے والے ادارے، فوجی تنصیبات اور بڑے تجارتی مراکز دہشت گرد تنظیموں کے ممکنہ ہدف بن سکتے ہیں، جس کے پیش نظر شہریوں کو محتاط رہنے کی ہدایت کی گئی ہے۔

امریکی مشن نے اپنے شہریوں کو خاص طور پر رش کے اوقات میں اور حساس علاقوں کے دورے کے دوران انتہائی محتاط رہنے کا مشورہ دیا ہے۔ 

شہریوں کو یہ بھی ہدایت کی گئی ہے کہ وہ ذاتی سکیورٹی کے بہترین اقدامات اپنائیں، اپنے ارد گرد ہوشیار رہیں، بھیڑ سے گریز کریں اور اپنی سٹیپ رجسٹریشن (STEP) اپ ڈیٹ رکھیں۔

امریکی شہریوں کیلئے حفاظتی تجاویز

احتیاط برتیں اور اگر اچانک فوجی سرگرمیوں کے قریب ہوں تو علاقے سے نکل جائیں۔

مقامی میڈیا اور سرکاری ذرائع سے اپ ڈیٹس لیتے رہیں۔

کم پروفائل رہیں اور اپنے ارد گرد ہوشیار رہیں۔

شناختی دستاویزات ہمیشہ ساتھ رکھیں اور حکام کے ساتھ تعاون کریں۔

پاکستان کے لیے ملک کی سیکیورٹی رپورٹ کا جائزہ لیں اور خطرناک علاقوں سے گریز کریں۔

شدت پسند گروہوں کی دھمکیاں

واضح رہے کہ آج ہی کالعدم تنظیم جماعت الاحرار نے اپنے پلیٹ فارمز پر ایک حکم نامہ جاری کیا ہے جس میں ملحقہ گروہوں کو پاکستان، خصوصاً سندھ اور پنجاب میں حملوں کی ہدایت کی گئی ہے۔

اسی طرح کالعدم تحریک طالبان پاکستان (ٹی ٹی پی) کے سربراہ نور ولی محسود اور جماعت الاحرار اور اتحاد المجاہدین کے کمانڈر حافظ گل بہادر کے تحریری بیانات کے بعد آڈیو پیغامات بھی سامنے آئے ہیں، جن میں امیروں، کمانڈروں اور جنگجوؤں کو افغان طالبان کی حمایت میں میدان میں آنے اور پاکستان میں بڑے حملے کرنے کی ہدایت کی گئی ہے۔

امریکہ نے واضح کیا ہے کہ اس اقدام کا مقصد اپنے شہریوں کی حفاظت کرنا ہے اور خطے میں کسی بھی غیر متوقع واقعے سے بچاؤ کے لیے ضروری اقدامات کیے جا رہے ہیں۔