امریکی صدر جو بائیڈن اور چین کے صدر شی جن پنگ کے درمیان طویل آن لائن ملاقات

واشنگٹن (ڈیلی اردو/وی او اے) امریکہ کے صدر جو بائیڈن کی صدارت سنبھالنے کے بعد ان کی پہلی بار چین کے صدر شی جن پنگ سے آن لائن ملاقات ہوئی ہے۔ اس سے قبل دونوں ملکوں کے صدور رواں برس فروری اور پھر ستمبر میں فون پر رابطہ کر چکے ہیں۔

VIDEO: US President Joe Biden and China's Xi Jinping opened a virtual summit on Monday with an appeal for better communication between the superpowers and what Biden called "guardrails" to avoid conflict pic.twitter.com/F8hbTXiEgH

— AFP News Agency (@AFP) November 16, 2021

وائٹ ہاؤس کا کہنا ہے کہ صدر جو بائیڈن نے چین کے ہم منصب پر واضح کیا کہ امریکہ اپنے اتحادیوں اور شراکت داروں کے ساتھ مل کر مفادات اور روایت کے لیے ہمیشہ کھڑا رہے گا۔

جو بائیڈن نے ملاقات میں تنازعات سے بچنے پر بھی زور دیا اور ماحولیات سمیت دیگر عوامل پر مشترکہ طور پر کام کرنے پر زور دیا۔

وائٹ ہاؤس کے مطابق صدر بائیڈن نے اس بات پر زور دیا کہ 21 ویں صدی میں آگے بڑھنے کے لیے ایسے ضابطے ممکن بنائے جائیں جو بین الاقوامی آزاد نظام، قابلِ رسائی اور مساوات پر مبنی ہو۔

وائٹ ہاؤس نے یہ بیان امریکہ کے صدر جو بائیڈن اور چین کے صدر شی جن پنگ کی تین گھنٹوں سے زائد جاری رہنے والی ملاقات کے بعد جاری کیا۔

وائٹ ہاؤس کے بیان کے مطابق امریکہ بیجنگ کی ایک چین پالیسی کی حمایت کرتا ہے اور تائیوان کی آزادی کا بھی مخالف ہے۔ بیان میں مزید کہا گیا ہے کہ امریکہ موجودہ صورتِ حال کی یک طرفہ طور پر تبدیلی کی سختی سے مخالفت کرتا ہے اور آبنائے تائیوان میں امن یا توازن کو خراب کرنے کا بھی مخالف ہے۔

بائیڈن بظاہر امریکہ کی اس پالیسی کی جانب اشارہ کر رہے تھے جس کے تحت واشنگٹن سرکاری طور پر بیجنگ اور تائیوان ریلیشن ایکٹ کو تسلیم کرتا ہے۔

یہ ایکٹ واضح کرتا ہے کہ امریکہ کا تائیوان کے بجائے صرف چین سے سرکاری روابط رکھنے کا انحصار اسی توقع پر ہے کہ تائیوان کے مستقبل کا تعین پرامن طریقے سے کیا جائے گا۔