امریکی صدر ٹرمپ کی میزبانی میں آذربائیجان اور آرمینیا میں تاریخی امن معاہدہ

واشنگٹن (ڈیلی اردو) آذربائیجان کے صدر الہام علییف اور آرمینیا کے وزیر اعظم نکول پشینیان نے جمعہ کو وائٹ ہاؤس میں امریکی صدر ڈونلڈ ٹرمپ کی میزبانی میں کئی دہائیوں سے جاری تنازع ختم کرنے کے لیے امن معاہدے پر دستخط کیے۔

صدر ٹرمپ نے اسے "تاریخی" قرار دیتے ہوئے کہا کہ معاہدہ فریقین کے درمیان اہم ٹرانسپورٹ روٹس کھولے گا اور خطے میں امریکی اثر و رسوخ میں اضافہ کرے گا۔ وائٹ ہاؤس کے مطابق، معاہدے کے تحت امریکہ ایک بڑے ٹرانزٹ کوریڈور "ٹرمپ روٹ" کی تعمیر میں مدد کرے گا۔

دونوں رہنماؤں نے ہمیشہ کے لیے لڑائی ختم کرنے، سفر، کاروبار اور سفارتی تعلقات بحال کرنے پر اتفاق کیا۔

تنازع کا پس منظر

آرمینیا اور آذربائیجان جنوبی قفقاز میں واقع ہیں۔ سوویت دور میں 1923 میں نگورنو کاراباخ، جس میں آرمینیائی اکثریت تھی، آذربائیجان کا خودمختار خطہ بنایا گیا۔ 1988 میں آرمینیائی آبادی نے آرمینیا سے الحاق کی تحریک چلائی، جس سے نسلی کشیدگی بڑھی اور 1991 میں آزادی کے اعلان کے بعد دونوں ممالک میں جنگ چھڑ گئی۔

اس جنگ میں تقریباً 30 ہزار افراد ہلاک اور لاکھوں بے گھر ہوئے۔ 1993 تک آرمینیا نے نگورنو کاراباخ اور اردگرد کے کئی علاقوں پر قبضہ کر لیا تھا۔