اورکزئی میں ٹی ٹی پی اور داعش میں جھڑپ، 4 شدت پسند ہلاک، 2 شہری زخمی

واشنگٹن (ش ح ط) پاکستان کے شورش زدہ صوبے خیبر پختونخوا کے قبائلی ضلع اورکزئی میں دو شدت پسند گروپوں کے درمیان تصادم میں 4 شدت پسند ہلاک ہو گئے۔ 

ڈیلی اردو کے مطابق سنٹرل اورکزئی کے علاقے شیخان (تھانہ مشتی تورسمت کی حدود) میں کالعدم تحریک طالبان پاکستان (ٹی ٹی پی) اور کالعدم داعش خراسان کے درمیان جھڑپ میں متعدد شدت پسند ہلاک اور زخمی ہو گئے۔

پولیس اور ذرائع کے مطابق فائرنگ کا تبادلہ داعش خراسان کے کمانڈر عابد عرف حمزہ (جسے واحد عرف حمزہ بھی کہا جاتا ہے) گروپ اور ٹی ٹی پی کے کمانڈر احمد عرف معاویہ گروپ کے درمیان ہوا۔

جھڑپ کے نتیجے میں داعش خراسان کا مقامی کمانڈر عابد عرف حمزہ سمیت 3 شدت پسند ہلاک اور 2 زخمی ہوئے۔ جبکہ ٹی ٹی پی معاویہ گروپ کا ایک دہشتگرد ہلاک اور 3 عسکریت پسند شدید زخمی ہوئے۔

پولیس کے مطابق فائرنگ کے دوران 2 شہری بھی زخمی ہوئے ہیں۔

دوسری جانب کالعدم ٹی ٹی پی نے ایک بیان میں اورکزئی میں کسی بھی جھڑپ کی تردید کی ہے۔

ذرائع کا کہنا ہے کہ دونوں کالعدم تنظیموں کے درمیان کشیدگی کے باعث علاقے میں خوف و ہراس پھیل گیا۔