اٹک میں پولیس اہلکاروں پر حملے میں ملوث ایک دہشت گرد سمیت 4 ملزمان مقابلے میں ہلاک

اٹک (ڈیلی اردو) صوبہ پنجاب کے ضلع اٹک میں مبینہ پولیس مقابلے کے دوران فائرنگ کے تبادلے میں ایک دہشت گرد سمیت 4 ملزمان ہلاک ہوگئے۔

پولیس کے مطابق حضرو میں نامعلوم مسلح حملہ آوروں نے دہشت گردوں کو چھڑانے کی کوشش کی تاہم چاروں ملزمان اپنے ہی ساتھیوں کی گولیاں لگنے سے مارے گئے۔

ہلاک ہونے والوں میں دہشت گرد نور ولی بھی شامل ہے جبکہ لاشوں کو پوسٹ مارٹم کیلئے اسپتال منتقل کردیا گیا۔

یاد رہے کہ تین ہفتے قبل حضرو میں پولیس اہلکار گشت پر موجود تھے اس دوران نامعلوم مسلح افراد نے فائرنگ کر دی۔ جس کے نتیجے میں پولیس کانسٹیبل قدیر خان موقع پر دم توڑ گئے جبکہ کانسٹیبل محمد نصرت شدید زخمی ہوگئے تھے جبکہ تیسرا اہلکار خوش قسمتی سے محفوظ رہا۔