ایران میں جنگ کے آغاز سے اب تک 21 افراد کو سزائے موت، 4 ہزار گرفتار: اقوام متحدہ

جنیوا (ڈیلی اردو ) سوئٹزرلینڈ کے شہر جنیوا سے جاری رپورٹ کے مطابق اقوام متحدہ کے انسانی حقوق کے دفتر نے کہا ہے کہ 28 فروری کو ایران پر امریکہ اور اسرائیل کے فضائی حملوں کے بعد شروع ہونے والی موجودہ مشرق وسطیٰ کی جنگ کے دوران اب تک ایران میں کم از کم 21 افراد کو سزائے موت دی جا چکی ہے جبکہ تقریباً 4,000 افراد کو گرفتار کیا گیا ہے۔

اقوام متحدہ کے مطابق سزائے موت پانے والوں میں سے کم از کم 9 افراد کو جنوری میں ہونے والے حکومت مخالف احتجاج میں شرکت پر سزا دی گئی، 10 افراد کو اپوزیشن گروپوں کی رکنیت کے الزامات پر جبکہ 2 افراد کو مبینہ جاسوسی کے الزامات کے تحت پھانسی دی گئی۔

ہیومن رائٹس آفس کے بیان میں مزید کہا گیا کہ 28 فروری کے بعد سے ایران میں 4,000 سے زائد افراد کو قومی سلامتی سے متعلق الزامات کے تحت گرفتار کیا جا چکا ہے۔