ایران میں حجاب کی خلاف ورزی پر میراتھن کی منتظم خواتین کے خلاف مقدمہ درج

تہران (ڈیلی اردو) ایرانی عدلیہ نے کِش جزیرے پر منعقدہ میراتھن کے منتظمین کے خلاف فوجداری مقدمہ قائم کر دیا ہے، جہاں سامنے آنے والی تصاویر میں خواتین کو بغیر حجاب دوڑتے دیکھا گیا۔ 

ایرانی عدلیہ کا مزید  کہنا ہے کہ حجاب نہ پہننے والی خواتین کو میراتھن میں شرکت کی اجازت دینے پر ریس کے دو منتظمین کو گرفتار بھی کر لیا گیا ہے۔

مقامی میڈیا کے مطابق جمعہ کے روز ہونے والی اس دوڑ میں پانچ ہزار سے زائد افراد نے حصہ لیا جبکہ آن لائن شیئر کی گئی تصاویر میں متعدد خواتین کو اسلامی جمہوریہ کے سخت لباسقوانین کی خلاف ورزی کرتے ہوئے دیکھا گیا۔ یہ قوانین 1980 سن کی دہائی کے اوائل میں نافذ کیے گئے تھے۔

میزان آن لائن کے مطابق مقامی پراسیکیوٹر نے کہا، ’’ملک کے موجودہ قوانین، ضابطوں اور مذہبی و سماجی اصولوں کی پابندی سے متعلق پہلے دی گئی تنبیہات کے باوجود یہ ایونٹ ایسے انداز میں منعقد کیا گیا، جس سے عوامی اخلاقیات کی خلاف ورزی ہوئی۔‘‘  

انہوں نے کہا،  ’’ان خلاف ورزیوں کو مدنظر رکھتے ہوئے، قوانین کے تحت اس ایونٹ کے منتظمین اور ذمہ داران کے خلاف فوجداری مقدمہ درج کیا گیا ہے۔‘‘

 ایران میں خواتین کے لیے سر ڈھانپنا اور ڈھیلا ڈھالا لباس پہننا لازمی ہے۔

تاہم سن 2022 میں مہسا امینی کی زیر حراست موت کے بعد شروع ہونے والے احتجاجی مظاہروں کے بعد سے حجاب قوانین پر عمل درآمد کم ہوتا جا رہا ہے۔ رواں ہفتے پارلیمنٹ کے اکثریتی ارکان نے عدلیہ پر حجاب قانون نافذ کرنے میں ناکامی کا الزام لگایا، جس کے بعد چیف جسٹس غلام حسین محسنی ایجی نے سخت تر اقدامات پر زور دیا۔

صدر مسعود پزشکیان کی حکومت نے پارلیمنٹ کے اس بل کی توثیق سے انکار کیا ہے، جس میں حجاب نہ پہننے والی خواتین کے لیے سخت سزائیں تجویز کی گئی تھیں۔