ایران نے آبنائے ہرمز سے 10 آئل ٹینکرز پاکستانی پرچم کے ساتھ گزرنے دیے، امریکی صدر

واشنگٹن (ڈیلی اردو) امریکی صدر ڈونلڈ ٹرمپ نے کابینہ کے اجلاس کے دوران بتایا کہ آبنائے ہرمز سے تیل سے بھرے آٹھ آئل ٹینکرز گزر چکے ہیں۔ انہوں نے کہا کہ ان آئل ٹینکرز پر غالباً پاکستانی پرچم تھا، جس پر صدر نے کہا کہ “ہم درست لوگوں سے بات کر رہے ہیں۔”

صدر ٹرمپ نے مزید دعویٰ کیا کہ ایران نے ماضی میں دیے گئے ایک بیان پر معذرت کی اور مزید دو آئل ٹینکرز بھیجنے کا اعلان کیا، جس کے بعد مجموعی تعداد 10 ہو گئی۔ انہوں نے کہا کہ ایران نے یہ ٹینکرز خیر سگالی کے طور پر گزرنے کی اجازت دی تاکہ یہ ظاہر کیا جا سکے کہ وہ مذاکرات کے لیے سنجیدہ ہے۔

ٹرمپ کے نمائندہ خصوصی سٹیو وٹکوف اور پاکستان کے وزیرِ خارجہ اسحاق ڈار دونوں نے تصدیق کی کہ جنگ بندی کے لیے 15 نکاتی امریکی مجوزہ منصوبہ اسلام آباد کے ذریعے تہران بھیجا گیا، تاہم ایران نے گذشتہ روز اس منصوبے پر منفی ردِ عمل دیا اور اپنے سرکاری میڈیا کے ذریعے پانچ شرائط رکھیں۔

صدر ٹرمپ نے جمعرات کے اجلاس میں ایک بار پھر مذاکرات پر زور دیتے ہوئے کہا: “تیل سے بھرے آٹھ ٹینکرز آبنائے ہرمز سے گزرے۔ میرے خیال میں ان پر پاکستانی جھنڈے تھے۔ ہم ٹھیک لوگوں سے بات کر رہے ہیں۔”

انہوں نے مزید کہا کہ ایران نے ماضی میں کہی گئی کسی بات پر معذرت کی اور دو مزید آئل ٹینکر بھیجنے کا اعلان کیا، جس کے بعد مجموعی تعداد 10 ہو گئی۔

صدر ٹرمپ کا کہنا تھا کہ ایران کے ساتھ مذاکرات جاری ہیں، لیکن ایران نے اس دعوے کی تردید کی ہے۔