ایران کے سپریم لیڈر کی ہلاکت کے بعد پاکستان میں ہنگامے، 25 افراد ہلاک

اسلام آباد (ڈیلی اردو/اے ایف پی) پاکستان میں امریکہ اور اسرائیل مخالف مظاہروں کے دوران ہلاکتوں کی تعداد بڑھ کر 25 ہو گئی ہے۔ یہ پُرتشدد احتجاج آیت اللہ علی خامنہ ای کی ہلاکت کی خبر کے بعد شروع ہوئے۔ ہلاکتوں کے اعداد و شمار فرانسیسی خبر رساں ادارے اے ایف پی کی مرتب کردہ معلومات پر مبنی ہیں۔

پاکستان کے متعدد بڑے شہروں میں مظاہرے پھوٹ پڑے، جن میں کراچی بھی شامل ہے، جہاں بعض مظاہرین نے امریکی قونصل خانے کی عمارت میں داخل ہونے کی کوشش کی۔ پولیس کی جانب سے ہجوم کو منتشر کرنے کی کوشش کے بعد مظاہرین اور اہلکاروں کے درمیان جھڑپیں شروع ہو گئیں۔

کراچی پولیس کے ایک اعلیٰ افسر کے مطابق کم از کم 10 افراد ہلاک اور 70 سے زائد زخمی ہوئے۔ اے ایف پی کے مطابق ایک ہسپتال کے ریکارڈ میں نو افراد کی موت گولی لگنے سے ہوئی۔

اُدھر گلگت بلتستان میں حکام کا کہنا ہے کہ مظاہرین اور پولیس کے درمیان جھڑپوں میں کم از کم 13 افراد ہلاک ہوئے۔ ریسکیو حکام کے مطابق گلگت میں سات جبکہ اسکردو میں چھ افراد مارے گئے۔

گلگت اور اسکردو میں رات گئے کرفیو نافذ کر دیا گیا ہے، جو بدھ تک برقرار رہے گا، جبکہ فوج کو بھی تعینات کر دیا گیا ہے۔

اسلام آباد میں بھی ہزاروں افراد نے احتجاج کیا، جن میں سے بہت سے لوگ آیت اللہ علی خامنہ ای کی تصاویر اٹھائے ہوئے تھے۔ اس دوران دو افراد ہلاک ہوئے۔

اے ایف پی کے مطابق اتوار کی دوپہر پولیس نے سفارتی علاقے کے قریب، جہاں امریکی سفارت خانہ واقع ہے، مظاہرین کو منتشر کرنے کے لیے آنسو گیس کا استعمال کیا۔