ایران کے عراقی کردستان میں کرد اپوزیشن کے مراکز پر ڈرون حملے

عراق (ڈیلی اردو/اے ایف پی) عراقی کردستان میں جمعے کے روز ایرانی کرد اپوزیشن گروپ کی تنصیبات ڈرون حملوں کا نشانہ بنیں، جو حالیہ دنوں میں اس نوعیت کے حملوں کی تازہ کڑی ہے۔

مقامی حکام کے مطابق دھماکا خیز مواد سے لدے چھ ڈرونز نے اربیل کے مضافات میں ایران کی کردستان ڈیموکریٹک پارٹی کے ایک کیمپ کو نشانہ بنایا، جس کے نتیجے میں زور دار دھماکے ہوئے۔

ابتدائی طور پر کسی جانی نقصان کے بارے میں کوئی واضح معلومات سامنے نہیں آئیں۔

عینی شاہدین کے مطابق ایک ڈرون نے اربیل کے شمال مشرق میں اسی گروپ کے ایک دفتر کو بھی نشانہ بنایا، تاہم اس حملے میں کوئی جانی نقصان نہیں ہوا۔

ایرانی افواج اس سے قبل بھی پڑوسی ملک عراق میں ایرانی اپوزیشن کے کرد گروپوں پر حملے کر چکی ہیں۔

امریکی صدر ڈونلڈ ٹرمپ نے ایران کے خلاف ممکنہ کارروائی کے لیے کرد اپوزیشن قوتوں کی حمایت کا اظہار کیا ہے، جبکہ اطلاعات ہیں کہ واشنگٹن ایرانی کردوں کو تہران میں ملکی قیادت کے خلاف بغاوت پر ابھار رہا ہے۔

عراق نے کہا ہے کہ وہ اپنی سرزمین کو پڑوسی ممالک کے خلاف حملوں کے لیے استعمال نہیں ہونے دے گا۔

عراق کے خود مختار خطے عراقی کردستان کے حکام نے بھی امریکہ اور اسرائیل کی ایران کے خلاف جاری جنگ میں غیر جانبدار رہنے کا عہد کیا ہے۔